തിയേറ്ററില്‍ 90 കോടി നേടിയ ചിത്രമാണ് ‘ഗുരുവായരൂരമ്പല നടയില്‍’. എന്നാല്‍ തിയേറ്ററില്‍ ഹിറ്റ് ആയ ചിത്രം ഒ.ടി.ടിയില്‍ എത്തിയപ്പോള്‍ മുതല്‍ വിമര്‍ശനങ്ങളാണ് ഉയരുന്നത്. കോമഡികളൊന്നും വര്‍ക്ക് ആയില്ല, ക്രിഞ്ച് ഐറ്റം എന്നിങ്ങനെയാണ് സിനിമയ്‌ക്കെതിരെ ഉയരുന്ന വിമര്‍ശനങ്ങള്‍. ഇതിന് മറുപടിയുമായി രംഗത്തെത്തിയിരിക്കുകയാണ് ചിത്രത്തിന്റെ സംവിധായകന്‍ വിപിന്‍ ദാസ്.
ചിത്രത്തിന്റെ പ്രൈവറ്റ് സ്‌ക്രീനിങ് കഴിഞ്ഞപ്പോഴെ ഇത് ഒ.ടി.ടിയില്‍ വര്‍ക്ക് ആകില്ലെന്ന് മനസിലായിരുന്നു, അതുകൊണ്ടാണ് ചിത്രത്തിന്റെ പ്രമോഷനിടെ ഇത് തിയേറ്ററില്‍ തന്നെ കാണേണ്ട സിനിമയാണ് എന്ന് എടുത്തു പറഞ്ഞത് എന്നാണ് ഒരു യൂട്യൂബ് ചാനലിന് നല്‍കിയ അഭിമുഖത്തില്‍ വിപിന്‍ ദാസ് പറയുന്നത്.
”ഒ.ടി.ടിയില്‍ എത്തുമ്പോള്‍ സിനിമക്ക് അത്ര നല്ല സ്വീകരണം കിട്ടാന്‍ ചാന്‍സില്ലെന്ന് പ്രൈവറ്റ് സ്‌ക്രീനിങ് കഴിഞ്ഞപ്പോള്‍ തന്നെ ഏറെക്കുറെ മനസിലായിരുന്നു. തിയേറ്റര്‍ റിലീസിന് മുന്നേ ഇതൊരു പോപ്‌കോണ്‍ എന്റര്‍ടൈനറാണെന്ന് പറഞ്ഞത് അതുകൊണ്ടാണ്. തിയേറ്ററില്‍ ഇതിലെ ഒരുവിധം കോമഡികളെല്ലാം വര്‍ക്കാകുമെന്ന് ഉറപ്പായിരുന്നു.”
”ഇനി ഒ.ടി.ടിയില്‍ ഇറങ്ങുമ്പോള്‍ കാണാന്‍ കാത്തിരിക്കുന്നവരോട് ഒരൊറ്റ കാര്യമേ പറയാനുള്ളൂ. ഉച്ചക്ക് ചോറ് കഴിച്ചു കൊണ്ടിരിക്കുമ്പോള്‍ ഈ സിനിമ കാണാന്‍ ശ്രമിക്കുക, അപ്പോള്‍ നിങ്ങള്‍ക്ക് ഇഷ്ടപ്പെടും. അല്ലാതെ രാത്രി ഒറ്റക്കിരുന്ന് ത്രില്ലര്‍ സിനിമ കാണുന്ന മൂഡ് പോലെ സെറ്റാക്കി ഇരുന്നാല്‍ പടം കണ്ട് നിരാശപ്പെടേണ്ടി വരും” എന്നാണ് വിപിന്‍ ദാസ് പറയുന്നത്.
അതേസമയം, പൃഥ്വിരാജും ബേസില്‍ ജോസഫും നായകന്മാരായി എത്തിയ ചിത്രം ഗുരുവായൂരില്‍ വച്ച് നടക്കാനിരിക്കുന്ന ഒരു കല്യാണത്തെ കുറിച്ചാണ് പറയുന്നത്. പൃഥ്വിരാജ് കോമഡി സീന്‍ ചെയ്യാന്‍ കഷ്ടപ്പെടുന്നു എന്നതടക്കമുള്ള വിമര്‍ശനങ്ങള്‍ എത്തിയിരുന്നു. അനശ്വര രാജയന്‍, നിഖില വിമല്‍ എന്നിവരാണ് ചിത്രത്തിലെ മറ്റ് പ്രധാന താരങ്ങള്‍.