കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയെ പരിഹസിച്ച് ബോളിവുഡ് നടന്‍ വിവേക് ഒബ്‌റോയ്. രാഹുല്‍ ഗാന്ധിയെ കുറിച്ച് സിനിമ ചെയ്യാന്‍ അദ്ദേഹം എന്താണ് ചെയ്തിട്ടുള്ളതെന്നും, ചിത്രം ചെയ്താല്‍ തന്നെ എല്ലാം തായലാന്‍ഡില്‍ ചിത്രീകരിക്കേണ്ടി വരുമെന്നും വിവേക് ഒബ്‌റോയ് പറഞ്ഞു. പി എം നരേന്ദ്രമോദി സിനിമയുമായി ബന്ധപ്പെട്ട് എന്‍ഡിടിവിക്ക് നല്‍കിയ അഭിമുഖത്തിലാണ് അദ്ദേഹത്തിന്റെ പരിഹാസം.
താന്‍ നരേന്ദ്രമോദിയുടെ വലിയ ആരാധകനാണെന്നും വിവേക് ഒബ്‌റോയ് പറയുന്നു. “റെയില്‍വെ സ്റ്റേഷനില്‍ ചായ വിറ്റ് നടന്നിരുന്ന ഒരു ചെറുപ്പക്കാരന്‍ ഒരു ജാതിയുടെയോ സംഘടനയുടെയോ പിന്‍ബലമില്ലാതെ ഒരു രാജ്യത്തിന്റെ പ്രധാനമന്ത്രിയായി. ഇന്ന് അമേരിക്കന്‍ പ്രസിഡന്റുമായും ജപ്പാന്‍ പ്രധാനമന്ത്രിയുമായും മുഖാമുഖം സംസാരിക്കുന്ന ലോകനേതാവാണ് അദ്ദേഹം. ഇതുപോലൊരു കഥാപാത്രം എപ്പോഴും ചെയ്യാന്‍ സാധിക്കുന്ന ഒന്നല്ല.” അദ്ദേഹം പറഞ്ഞു.
അതേസമയം, പ്രധാനമന്ത്രി നരേന്ദ്രമോദിയുടെ ജീവിതകഥ പറയുന്ന സിനിമയുടെ റിലീസ് വീണ്ടും മാറ്റി. ഈ മാസം 12 ന് ചിത്രം റിലീസ് ചെയ്യുമെന്ന് അണിയറപ്രവര്‍ത്തകര്‍ അറിയിച്ചു. വെള്ളിയാഴ്ച ചിത്രം റിലീസ് ചെയ്യുമെന്നാണ് നേരത്തെ അറിയിച്ചിരുന്നത്. തfരഞ്ഞെടുപ്പിന് ആഴ്ചകള്‍ക്കു മുമ്പ് ചിത്രം റിലീസ് ചെയ്യുന്നതിനെതിരെ പ്രതിപക്ഷം രംഗത്തെത്തിയിരുന്നു.