ബോക്‌സ് ഓഫീസില്‍ വന്‍ ഫ്‌ളോപ്പ് ആയി മാറിയ ചിത്രമാണ് മോഹന്‍ലാല്‍ നായകനായ വൈശാഖ് ചിത്രം ‘മോണ്‍സ്റ്റര്‍’. മമ്മൂട്ടിയെ നായകനാക്കി ഒരുക്കിയ ‘ടര്‍ബോ’ ഗംഭീര വിജയം നേടിയതിന് പിന്നാലെ മോണ്‍സ്റ്ററിന്റെ ക്ഷീണം തീര്‍ക്കുമെന്നും മോഹന്‍ലാലിനൊപ്പം പുതിയ സിനിമ വരുമെന്നും വൈശാഖ് തുറന്നു പറഞ്ഞിരുന്നു.
ഒരു യൂട്യൂബ് ചാനലിന് നല്‍കിയ അഭിമുഖത്തിലാണ് സംവിധായകന്‍ വൈശാഖ് ഇക്കാര്യം വെളിപ്പെടുത്തിയത്. ഇപ്പോഴിതാ, ഇനി ചെയ്യാനിരിക്കുന്ന മോഹന്‍ലാല്‍ ചിത്രത്തെ കുറിച്ച് കൂടുതല്‍ കാര്യങ്ങള്‍ തുറന്നു പറഞ്ഞിരിക്കുകയാണ് വൈശാഖ്. മോഹന്‍ലാലിനൊപ്പം ഒരു ആക്ഷന്‍ സിനിമയാണ് ചെയ്യുന്നത് എന്നാണ് സംവിധായകന്‍ പറയുന്നത്.
”എല്ലാ വിമര്‍ശനങ്ങളും ഏറ്റുവാങ്ങി, മോഹന്‍ലാലിനൊപ്പമുള്ള എന്റെ അടുത്ത ചിത്രത്തിലൂടെ ആ നഷ്ടം തിരികെ പിടിക്കും. മോഹന്‍ലാലുമൊത്തുള്ളത് ഒരു വലിയ ആക്ഷന്‍ ചിത്രമായിരിക്കും. സിനിമയുടെ തിരക്കഥ ഇതിനകം തന്നെ പൂര്‍ത്തിയായി കഴിഞ്ഞു.”
”മോഹന്‍ലാലിന്റെ ആശിര്‍വാദ് സിനിമാസാണ് പദ്ധതിക്ക് പിന്തുണ നല്‍കുന്നത്” എന്നാണ് വൈശാഖ് പറയുന്നത്. മോണ്‍സ്റ്റര്‍ ചെയ്യാനുണ്ടായ സാഹചര്യത്തെ കുറിച്ചും സംവിധായകന്‍ പറയുന്നുണ്ട്. ”ലോക്ഡൗണ്‍ കാലത്തെ സാമ്പത്തിക പ്രതിസന്ധിയെ തുടര്‍ന്നാണ് മോണ്‍സ്റ്റര്‍ ചെയ്യാന്‍ നിര്‍ബന്ധിതനായത്.”
”ചിത്രം ആദ്യം ഒ.ടി.ടിക്ക് വേണ്ടി നിര്‍മ്മിച്ചതാണ്. എന്നാല്‍ ഒഴിവാക്കാനാവാത്ത ചില കാരണങ്ങളാല്‍ തിയേറ്ററുകളില്‍ റിലീസ് ചെയ്യേണ്ടി വന്നതാണ്” എന്നും വൈശാഖ് വ്യക്തമാക്കി. അതേസമയം, ടര്‍ബോ 60 കോടി കളക്ഷന്‍ നേടി തിയേറ്ററുകളില്‍ കുതിക്കുകയാണ്. മമ്മൂട്ടി അടുത്തിടെ ചെയ്തതില്‍ വച്ചേറ്റവും വലിയ ആക്ഷന്‍ സിനിമയാണിത്.
