നടന്‍ വിഷ്ണു വിശാലിനൊപ്പം പുതുവര്‍ഷ ദിനം ആഘോഷിക്കുന്ന ചിത്രങ്ങള്‍ ബാഡ്മിന്റണ്‍ താരം ജ്വാല ഗുട്ട പുറത്ത് വിട്ടിരുന്നു. ഇരുവരും പ്രണയത്തിലാണെന്ന അഭ്യൂഹം ചൂടാരാതെ പ്രചരിക്കവേയാണ് ചിത്രങ്ങള്‍ പുറത്തു വന്നത്. ഇപ്പോഴിതാ തങ്ങളുടെ ബന്ധത്തെ കുറിച്ച് മനസ് തുറന്ന രംഗത്ത് വന്നിരിക്കുകയാണ് ജ്വാല ഗുട്ട. വളരെ സീരീസായ ബന്ധമാണിതെന്നാണ് ജ്വാല പറയുന്നത്.
“ഞങ്ങളുടെ ബന്ധത്തെക്കുറിച്ച് ഇപ്പോള്‍ എല്ലാവര്‍ക്കും അറിയാം.വിഷ്ണുമായി അടുത്തത് വളരെ യാദൃശ്ചികമായാണ്. വളരെ സ്വാഭാവികമായാണ് ഞങ്ങള്‍ ആദ്യം കണ്ടുമുട്ടുന്നത്. പിന്നീട് കൂടുതല്‍ അടുക്കുകയും ചെയ്തു. ഇടയ്ക്കിടെ കാണുകയും സംസാരിക്കുകയും ചെയ്തു. ഇതിലൂടെ പരസ്പരം നല്ലതുപോലെ മനസിലാക്കാന്‍ സാധിച്ചു. ബാഡ്മിന്റണുമായി ബന്ധപ്പെട്ട് എന്റെ പ്രവര്‍ത്തനങ്ങള്‍ക്ക് വിഷ്ണു പൂര്‍ണ പിന്തുണ നല്‍കുന്നുണ്ട്.”
https://www.instagram.com/p/B6wLp6nhLiq/?utm_source=ig_web_copy_link
“ഞാന്‍ ഹൈദരാബാദില്‍ ആണെങ്കിലും ചെന്നൈയിലുള്ള വിഷ്ണു ഇടയ്ക്കിടെ കാണാന്‍ വരാറുണ്ട്. ഹൈദരാബാദിന് പുറത്തുള്ള ഒരാളുമായി അടുപ്പത്തിലാകുമെന്ന് ഒരിക്കലും കരുതിയതല്ല. എന്റെ ഇഷ്ടങ്ങള്‍ക്ക് കൂടുതല്‍ സ്വാതന്ത്ര്യം അനുവദിച്ചു തരുന്നയാളാണ് അദ്ദേഹം. ചലച്ചിത്രമേഖലയിലെ അദ്ദേഹത്തിന്റെ തിരക്കുകള്‍ മനസിലാക്കിതന്നെയാണ് ഞാനും ഇഷ്ടപ്പെട്ടത്. ഈ ബന്ധം വളരെ സീരിയസാണ്.” ജ്വാല പറഞ്ഞു.
രാക്ഷസന്‍ എന്ന ചിത്രത്തിലൂടെ തെന്നിന്ത്യയില്‍ ശ്രദ്ധ നേടിയ താരമാണ് വിഷ്ണു വിശാല്‍. രാക്ഷസന്‍ തിയേറ്ററുകളില്‍ നിറഞ്ഞ കൈയടി നേടി മുന്നേറുമ്പോഴാണ് വിഷ്ണു വിശാല്‍ വിവാഹമോചിതനാകുന്നുവെന്ന വിവരം ആരാധകരെ അറിയിച്ചത്. വിവാഹമോചിതനായതിന് ശേഷം വിഷ്ണുവിനെക്കുറിച്ച് ധാരാളം ഗോസിപ്പുകളാണ് പൊട്ടിപ്പുറപ്പെട്ടത്. നടി അമല പോളുമായി വിഷ്ണു പ്രണയത്തിലാണെന്ന് അഭ്യൂഹങ്ങള്‍ പ്രചരിച്ചിരുന്നു.