ബോളിവുഡിലെ സെലിബ്രിറ്റി ദമ്പതികളായ ദീപിക പദുകോണിനും രൺവീർ സിങ്ങിനും പെൺകുഞ്ഞ് ജനിച്ചതോടെ സോഷ്യൽ മീഡിയയിൽ അടക്കം ആരാധകരുടെ സന്തോഷപ്രകടനമാണ്. എന്നാൽ രൺവീർ കുറച്ചു നാളുകൾക്ക് മുൻപ് പറഞ്ഞ വാക്കുകളാണ് ഇപ്പോൾ ശ്രദ്ധ നേടുന്നത്.
തൻ്റെ ക്വിസ് ഷോയായ ദി ബിഗ് പിക്ചറിലെ ഒരു മത്സരാർത്ഥിയോടാണ് രൺവീർ ഇതേക്കുറിച്ചു സംസാരിച്ചത്. ‘നിങ്ങൾക്കറിയാവുന്നതുപോലെ ഞാൻ വിവാഹിതനാണ്, അടുത്ത 2-3 വർഷത്തിനുള്ളിൽ കുട്ടികളുണ്ടായേക്കാം. നിങ്ങളുടെ പെങ്ങൾ (ദീപിക പദുകോൺ) വളരെ സുന്ദരിയായ ഒരു കുഞ്ഞായിരുന്നു. ഞാൻ എല്ലാ ദിവസവും അവളുടെ കുഞ്ഞിൻ്റെ ഫോട്ടോകൾ കാണുകയും ‘എനിക്ക് ഇതുപോലെ ഒരു കുഞ്ഞിനെ തരൂ, എൻ്റെ ജീവിതം സെറ്റ് ആകും.’ എന്ന് അവളോട് പറയുകയും ചെയ്യും.’ എന്നാണ് താരം പറഞ്ഞത്.
കഴിഞ്ഞ ദിവസം മുംബൈയിലെ ഒരു ആശുപത്രിയിൽ ഇരുവരും എത്തിയത് വാർത്തകളിൽ നിറഞ്ഞിരുന്നു. സൗത്ത് മുംബൈയിലെ ആശുപത്രിയിൽ കുടുംബത്തോടൊപ്പം എത്തിയതായിരുന്നു രൺവീറും ദീപികയും. ഒരു ദിവസത്തിന് ശേഷമാണ് സന്തോഷകരമായ വാർത്ത വരുന്നത്.
2013-ൽ പുറത്തിറങ്ങിയ സഞ്ജയ് ലീല ബൻസാലിയുടെ ഗോലിയോൻ കി രാസ്ലീല രാം-ലീലയുടെ ചിത്രീകരണത്തിനിടെയാണ് ദീപികയും രൺവീറും പരസ്പരം ഡേറ്റിംഗ് ആരംഭിച്ചത്. 2018 നവംബർ 14ന് ഇറ്റലിയിലെ ലേക്ക് കോമോയിൽ വച്ചായിരുന്നു ദീപികയുടെയും രൺവീർറിന്റെയും വിവാഹം.
ആറ് വർഷത്തോളം ഇരുവരും ഡേറ്റിംഗിലായിരുന്നു. ഫൈൻഡിംഗ് ഫാനി, പദ്മാവത്, ബാജിറാവു മസ്താനി തുടങ്ങിയ ചിത്രങ്ങളിൽ ഇരുവരും ഒന്നിച്ച് അഭിനയിച്ചിട്ടുണ്ട്. സിങ്കം എഗെയ്ൻ എന്ന ചിത്രമാണ് ഇരുവരുടെതായി ഇനി റിലീസിന് ഒരുങ്ങുന്നത്.