കേരള സംഗീതനാടക അക്കാദമിയിലെ ഭരണസമിതിയുടെ കാര്യത്തില്‍ മുഖ്യമന്ത്രിക്ക് തുറന്ന കത്തെഴുതി നടന്‍ സന്തോഷ് കീഴാറ്റൂര്‍. കേരള സംഗീതനാടക അക്കാദമിയില്‍ രണ്ട് വര്‍ഷമായിട്ടും പുതിയ ഭരണസമിതി വന്നിട്ടില്ലെന്ന് സന്തോഷ് പറഞ്ഞു. സെക്രട്ടറിയായ കരിവെള്ളൂര്‍ മുരളിയും ചെയര്‍മാന്‍ മട്ടന്നൂര്‍ ശങ്കരന്‍കുട്ടി മാരാരും നിയമനം ലഭിച്ചിട്ടും ഇത് വരെ ചുമതലയേറ്റിട്ടില്ലെന്നും നടന്‍ പറഞ്ഞു.
പോസ്റ്റിന്റെ പൂര്‍ണരൂപം-
ബഹുമാനപ്പെട്ട മുഖ്യമന്ത്രി ശ്രീ.പിണറായി വിജയന്‍ അവര്‍ക്കള്‍ക്ക് ഒരു തുറന്ന കത്ത്
സാര്‍,രണ്ടാം ഇടതുപക്ഷ സര്‍ക്കാര്‍ അധികാരമേറ്റെടുത്ത് രണ്ട് വര്‍ഷം ആകാന്‍ പോകുന്നു. ഇതിനിടയില്‍ കേരളത്തിലെ സാംസ്‌കാരിക മേഖലയിലെ അക്കാദമികളില്‍ പുതിയ ഭരണസമിതി അധികാരമേല്‍ക്കുകയും വളരെ ക്രിയാത്മകമായി പ്രവര്‍ത്തിച്ചു വരുന്നത് സന്തോഷത്തോടെ കാണുന്നു.വളരെ ഭൗര്‍ഭാഗ്യകരം എന്നു പറയട്ടെ, രണ്ട് വര്‍ഷമായിട്ടും കേരള സംഗീതനാടകഅക്കാദമിയില്‍ പുതിയ സെക്രട്ടറിയോ,ചെയര്‍മാനോ,ഭരണസമിതിയോ വന്നിട്ടില്ല. സെക്രട്ടറിയായി ശ്രീ.കരിവെള്ളൂര്‍മുരളി, ചെയര്‍മാന്‍ ശ്രീ.മട്ടന്നൂര്‍ശങ്കരന്‍കുട്ടി മാരാര്‍ഇവരെ നിയമിച്ചു. എന്ന വാര്‍ത്ത വലിയ സന്തോഷത്തോടെ പത്രമാധ്യമങ്ങളിലൂടെ അറിഞ്ഞു.
ആ വാര്‍ത്ത വന്ന് ഇത്രയും കാലമായിട്ടും ഇവര്‍ ചാര്‍ജ് ഏറ്റെടുത്തിട്ടില്ല. ഇത് വളരെ ആശങ്ക ഉളവാക്കുന്നു. മറ്റ് അക്കാദമികളേക്കാളും സമൂഹത്തിലെ താഴെതട്ടില്‍ പ്രവര്‍ത്തിക്കുന്ന പതിനായിരകണക്കിന് കലാസംഘടനകളെ അടക്കം ക്രിയാത്മകമായി ചലിപ്പിക്കേണ്ട ഉത്തരവാദിത്വം കേരളസംഗീത നാടകഅക്കാദമിയില്‍ നിക്ഷിപ്തമാണ്. സാംസ്‌കാരിക മൂല്യങ്ങള്‍ ഉയര്‍ത്തിപിടിക്കുന്ന പുതുതലമുറ വളര്‍ന്നുവരേണ്ടത്ഇന്നിന്റെ ആവശ്യമാണ്.
അതിന് കേരളസംഗീതനാടക അക്കാദമിക്ക് ഒരു പാട് കാര്യങ്ങള്‍ ചെയ്ത് കാണിക്കാന്‍ സാധിക്കും.സാംസ്‌കാരിക പ്രവര്‍ത്തനങ്ങളെ ഏകോപിപ്പിക്കാന്‍ സംഗീത നാടകഅക്കാദമിക്ക് സെക്രട്ടറിയും,ചെയര്‍മാനും അടക്കമുള്ള പുതിയ ഭരണസമിതിക്ക് എത്രയും വേഗം രൂപം നല്‍കണമെന്ന് വിനീതമായി അഭ്യര്‍ത്ഥിക്കുന്നു.ഇതിനോട് യോജിക്കുന്നവര്‍ക്ക് എഡിറ്റ് ചെയ്ത് പേര് ചേര്‍ക്കാം.