67-ാമത് ദേശീയ ചലച്ചിത്ര പുരസ്‌ക്കാരങ്ങള്‍ പ്രഖ്യാപിച്ചപ്പോള്‍ മികച്ച മലയാള സിനിമക്കുള്ള അവാര്‍ഡ് നേടിയിരിക്കുകയാണ് രാഹുല്‍ റിജി നായര്‍ സംവിധാനം ചെയ്ത “കള്ള നോട്ടം”. ന്യൂയോര്‍ക്ക് ഇന്ത്യന്‍ ചലച്ചിത്ര മേളകളില്‍ ഏറെ തിളങ്ങിയ ചിത്രമാണ് കള്ള നോട്ടം. 26ാമത് കൊല്‍ക്കത്ത ഇന്റര്‍നാഷണല്‍ ഫിലിം ഫെസ്റ്റിവലില്‍ മികച്ച ചിത്രത്തിനുള്ള ഗോള്‍ഡന്‍ റോയല്‍ ബംഗാള്‍ ടൈഗര്‍ അവാര്‍ഡും ചിത്രത്തിന് ലഭിച്ചിരുന്നു.
ചിത്രത്തിലെ പ്രകടനത്തിന് മികച്ച ബാലനടനുള്ള കേരള സംസ്ഥാന ചലച്ചിത്ര പുരസ്‌ക്കാരം വാസുദേവ് സജീഷ് മാരാര്‍ സ്വന്തമാക്കി. കൂടാതെ ഇന്‍ഡോ ജെര്‍മന്‍ ഫിലിം വീക്ക്, സൗത്ത് ഏഷ്യന്‍ ഫിലിം ഫെസ്റ്റിവലുകളിലേക്കും ചിത്രം തിരഞ്ഞെടുക്കപ്പെട്ടിരുന്നു. മൂന്ന് കുട്ടികളിലൂടെയാണ് കള്ള നോട്ടത്തിന്റെ കഥ തുടങ്ങുന്നത്. വിന്‍സെന്റ്, കിഷോര്‍, റോസി എന്ന കുട്ടികള്‍ ഒരു സിനിമ എടുക്കാന്‍ തീരുമാനിക്കുകയാണ്.
ഒരു കഥാപാത്രത്തിന് സംവിധായകന്‍ ആകണം. ഒരു കടയിലെ ക്യാമറ മോഷ്ടിച്ചു കൊണ്ടു വന്ന് ഷൂട്ടിംഗ് ആരംഭിക്കുകയാണ്. സിനിമ മുന്നോട്ടു പോകുന്നു. അതിനിടയില്‍ നായകനും നായികയും തമ്മില്‍ ചെറിയ പ്രശ്‌നം ഉണ്ടാവുന്നു. നിസഹായനായ സംവിധായകന്‍. പിന്നീട് എന്താണ് സംഭിക്കുക എന്നതാണ് സിനിമയുടെ കഥാപശ്ചാത്തലം. പൂര്‍ണമായും ഗോ പ്രോ ക്യാമറയില്‍ ചിത്രീകരിച്ച ആദ്യ സിനിമ കൂടിയാണ് കള്ള നോട്ടം.
നമ്മള്‍ കാണുന്നതെല്ലാം ക്യാമറ എന്ത് കാണുന്നോ അതാണ് കാണുക. ക്യാമറ എന്നത് പ്രധാന കഥാപാത്രമാണ്. തുടക്കത്തില്‍ ഒരു കുട്ടികളുടെ സിനിമ പോലെ തോന്നുമെങ്കിലും അതിനപ്പുറത്തേക്ക് ഈ ക്യാമറ ഷൂട്ട് ചെയ്തു കൊണ്ടിരിക്കുന്ന നായകന്റെയും നായികയുടെയും കഥക്ക് ശേഷം ഉണ്ടാവുന്ന പുതിയ സംഭവവികാസങ്ങള്‍ അതിനെ വേറൊരു തലത്തിലേക്ക് എത്തിക്കുന്നു. ടൊബിന്‍ തോമസ് ഛായാഗ്രഹണവും അപ്പു എന്‍ ഭട്ടതിരി എഡിറ്റിംഗും നിര്‍വ്വഹിച്ചിരിക്കുന്നു.
Read more
സിദ്ധാര്‍ഥ് പ്രദീപ് ആണ് സംഗീതം ഒരുക്കിയത്. വാസുദേവ് സജീഷ് മാരാര്‍, സൂര്യദേവ് സജീഷ് മാരാര്‍, വിനിത കോശി, രഞ്ജിത്ത് ശേഖര്‍ നായര്‍, അന്‍സു മറിയ തോമസ്, വിജയ് ഇന്ദുചൂഡന്‍, പി.ജെ ഉണ്ണികൃഷ്ണന്‍, ശ്രീജിത്ത് ബി, വിഷ്ണു പ്രേംകുമാര്‍, ശ്രീകാന്ത് മോഹന്‍ പട്ടത്തില്‍ എന്നിവരാണ് ചിത്രത്തിലെ പ്രധാന താരങ്ങള്‍.
