മികച്ച നടനുള്ള ദേശീയ പുരസ്‌കാരം നേടിയ ധനുഷിന് അഭിനന്ദനങ്ങളുമായി മഞ്ജു വാര്യര്‍. വെട്രിമാരന്‍ ചിത്രം “അസുരനി”ലെ അഭിനയത്തിനാണ് ധനുഷ് പുരസ്‌കാരത്തിന് അര്‍ഹനായത്. മഞ്ജു ആണ് ചിത്രത്തില്‍ താരത്തിന്റെ നായികയായെത്തിയത്. അസുരനിലെ ചിത്രങ്ങള്‍ പങ്കുവെച്ചാണ് മഞ്ജു ധനുഷിന് അഭിനന്ദനങ്ങള്‍ അറിയിച്ചിരിക്കുന്നത്.
“ധനുഷ്, നിങ്ങള്‍ ഇത് തീര്‍ച്ചയായും അര്‍ഹിക്കുന്ന അംഗീകാരമാണ്.. നിങ്ങളെ കുറിച്ചോര്‍ത്ത് അഭിമാനിക്കുന്നു”” എന്നാണ് മഞ്ജു ഫെയ്‌സ്ബുക്കില്‍ കുറിച്ചത്. അതേസമയം, മികച്ച നടനുള്ള ദേശീയ പുരസ്‌കാരം രണ്ടാം തവണയാണ് ധനുഷിന് ലഭിക്കുന്നത്. 2010ല്‍ ആണ് ധനുഷിന് ആദ്യ ദേശീയ പുരസ്‌ക്കാരം ലഭിക്കുന്നത്. വെട്രിമാരന്‍ സംവിധാനം ചെയ്ത ആടുകളം എന്ന ചിത്രത്തിലെ പ്രകടനത്തിന് ആയിരുന്നു പുരസ്‌ക്കാരം ലഭിച്ചത്.
11 വര്‍ഷത്തിനു ശേഷം വീണ്ടും വെട്രിമാരന്‍ ചിത്രത്തിലൂടെ ദേശീയ പുരസ്‌കാരം സ്വന്തമാക്കിയിരിക്കുകയാണ് ധനുഷ്. മധ്യവയസ്‌കനും യുവാവും കൗമാരക്കാരനുമായി മൂന്ന് കാലഘട്ടങ്ങളെയാണ് ധനുഷ് ചിത്രത്തില്‍ അവതരിപ്പിച്ചത്. ധനുഷിനൊപ്പം ബോളിവുഡ് താരം മനോജ് ബാജ്പേയ് ആണ് മികച്ച നടനുള്ള പുരസ്‌കാരം പങ്കിടുന്നത്. ഭോന്‍സ്ലെ എന്ന ചിത്രത്തിലെ പ്രകടനത്തിനാണ് പുരസ്‌കാരം.
2010ല്‍ നടന്‍ സലിം കുമാറിന് ഒപ്പമായിരുന്നു ധനുഷ് പുരസ്‌കാരം പങ്കിട്ടത്. ആദാമിന്റെ മകന്‍ അബു എന്ന ചിത്രത്തിന് ആയിരുന്നു സലിം കുമാറിന് പുരസ്‌കാരം
ലഭിച്ചത്. മികച്ച നടന്‍ കൂടാതെ നിര്‍മ്മാതാവ് എന്ന നിലയിലും ധനുഷ് രണ്ടു തവണ ദേശീയ പുരസ്‌കാരം നേടിയിട്ടുണ്ട്. 2014ല്‍ കാക്കമുട്ടൈ എന്ന ചിത്രത്തിനും 2015ല്‍ വെട്രിമാരന്‍ സംവിധാനം ചെയ്ത വിസാരണൈ എന്ന ചിത്രത്തിനുമാണ് പുരസ്‌കാരം
നേടിയത്.