നടിയുടെ പരാതിയിൽ മലയാളത്തിലെ പ്രമുഖ നടൻ ജയസൂര്യയ്‌ക്കെതിരെ കേസെടുത്തു. തിരുവനന്തപുരം കൻ്റോൺമെൻ്റ് പോലീസാണ് താരത്തിനെതിരെ ലൈംഗികാരോപണം ഉന്നയിക്കപ്പെട്ട സാഹചര്യത്തിൽ കേസെടുത്തത്.
വർഷങ്ങൾക്ക് മുമ്പ് സംസ്ഥാന സെക്രട്ടേറിയറ്റ് മന്ദിരത്തിൽ ഒരു സിനിമയുടെ ചിത്രീകരണത്തിനിടെയാണ് സംഭവം നടന്നതെന്ന് പരാതിയിൽ പറയുന്നു. ഈ സമയത്ത് ജയസൂര്യ തന്നെ പീഡിപ്പിക്കാൻ ശ്രമിച്ചുവെന്നാണ് നടിയുടെ വാദം. ഐപിസി 354, 354 എ, 509 എന്നീ വകുപ്പുകൾ പ്രകാരമാണ് ജയസൂര്യയ്‌ക്കെതിരെ കേസെടുത്തിരിക്കുന്നത്. സെക്രട്ടേറിയറ്റും പരിസരവും കൻ്റോൺമെൻ്റ് പോലീസിൻ്റെ അധികാരപരിധിയിലാണ്.
നടിയുടെ പരാതിയെ തുടർന്ന് പോലീസ് ചൊവ്വാഴ്ച ആലുവയിലെ വസതിയിലെത്തി മൊഴിയെടുക്കുകയും തുടർന്ന് നടനെതിരെ കേസെടുക്കുകയും ചെയ്തു. മലയാള സിനിമയിലെ ഏഴ് പ്രമുഖർക്കെതിരെ മോശം പെരുമാറ്റത്തിനും ആക്രമണത്തിനും നടി പരാതി നൽകിയിട്ടുണ്ട്.
