ബംഗാളി നടിക്കെതിരായ മോശം പെരുമാറ്റത്തിൻ്റെ പേരിൽ അടുത്തിടെ കേരള ചലച്ചിത്ര അക്കാദമി അധ്യക്ഷ സ്ഥാനം ഒഴിഞ്ഞ സംവിധായകൻ രഞ്ജിത്ത് ബാലകൃഷ്ണനെതിരെ കോഴിക്കോട് സ്വദേശിയായ യുവാവ് ലൈംഗികാതിക്രമ പരാതി നൽകി. 2012ൽ ബംഗളൂരുവിലെ ഒരു പഞ്ചനക്ഷത്ര ഹോട്ടലിൽ വെച്ച് രഞ്ജിത്ത് തന്നെ ലൈംഗികമായി ചൂഷണം ചെയ്തുവെന്നാണ് സംസ്ഥാന പോലീസ് മേധാവിക്ക് അയച്ച പരാതിയിൽ ഇയാൾ ആരോപിക്കുന്നത്.
തനിക്കുണ്ടായ ദുരനുഭവവും പരാതിക്കാരൻ മാധ്യമങ്ങളോട് പങ്കുവെച്ചു. കോഴിക്കോട്ട് മമ്മൂട്ടി നായകനായ ‘ബാവുട്ടിയുടെ നാമത്തിൽ’ എന്ന ചിത്രത്തിൻ്റെ ഷൂട്ടിങ്ങിനിടെ രഞ്ജിത്ത് തന്നെ കണ്ടെന്നും ടിഷ്യൂ പേപ്പറിൽ എഴുതിയ മൊബൈൽ നമ്പർ തന്നെന്നുമാണ് ഇയാൾ പറയുന്നത്. “ബംഗളൂരുവിലെ ഒരു പഞ്ചനക്ഷത്ര ഹോട്ടലിൽ വെച്ചാണ് രഞ്ജിത്ത് തന്നോട് മോശമായി പെരുമാറിയതെന്ന് പരാതിക്കാരൻ വെളിപ്പെടുത്തി. ഞാൻ എങ്ങനെയുണ്ടെന്ന് കാണണമെന്ന് പറഞ്ഞ് രഞ്ജിത്ത് എന്നോട് നഗ്നനാകാൻ പറഞ്ഞു, എൻ്റെ കണ്ണുകൾക്ക് ഭംഗിയുണ്ടെന്ന് പറഞ്ഞു, എൻ്റെ കണ്ണിൽ കണ്മഷി എഴുതാൻ ആവശ്യപ്പെട്ടു. രഞ്ജിത്ത് ചെയ്ത കാര്യങ്ങൾ കൂടുതൽ എനിക്ക് പറയാൻ കഴിയില്ല. ഞാൻ അത് പോലീസിനോട് പറയും.”പരാതിക്കാരൻ ഒരു വാർത്താ ചാനലിനോട് പറഞ്ഞു.
തനിക്ക് സിനിമയിൽ വേഷം തരാമെന്ന് രഞ്ജിത്ത് പറഞ്ഞെങ്കിലും കുറ്റം ആരോപിക്കപ്പെട്ടതിന് ശേഷം രഞ്ജിത്ത് തന്നെ ഒഴിവാക്കുകയായിരുന്നു. ഹേമ കമ്മീഷൻ റിപ്പോർട്ട് പുറത്ത് വന്നതിന് ശേഷം മലയാള സിനിമയിൽ മീ ടൂ ആരോപണങ്ങൾ ശക്തമായതിന് ശേഷം ഇതാദ്യമായാണ് ഒരാൾ ലൈംഗികാതിക്രമ പരാതിയുമായി രംഗത്ത് വരുന്നത്. സഹപ്രവർത്തകരായ സ്ത്രീകളിൽ നിന്ന് മോശം പെരുമാറ്റ/ലൈംഗിക പീഡന പരാതികൾ ഉയർന്ന മലയാള സിനിമാ വ്യവസായത്തിലെ നിരവധി പ്രമുഖരിൽ ഒരാളാണ് രഞ്ജിത്ത്.
2009ൽ കൊച്ചിയിൽ ഒരു സിനിമാ ചർച്ചയുടെ പേരിൽ രഞ്ജിത്ത് തന്നോട് അപമര്യാദയായി പെരുമാറിയെന്നാരോപിച്ച് ബംഗാളി നടി ശ്രീലേഖ മിത്ര പരാതി നൽകിയിരുന്നു.