മലയാള സിനിമ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ആടുജീവിതം. പൃഥ്വിരാജ് നായകനാകുന്ന ചിത്രം സംവിധാനം ചെയ്യുന്നത് ബ്ലെസിയാണ്. ചിത്രത്തിന്റെ രണ്ടാം ഘട്ട ചിത്രീകരണം അടുത്ത മാസം തുടങ്ങാനിരിക്കെ ചിത്രത്തിന് ജോര്‍ദ്ദാനില്‍ ചിത്രീകരണാനുമതി ലഭിച്ചില്ലെന്ന റിപ്പോര്‍ട്ടുകളാണ് വരുന്നത്. ഇതേ തുടര്‍ന്ന് പുതിയ ലൊക്കേഷനായി അള്‍ജീരിയ തിരഞ്ഞെടുത്തെന്നാണ് വിവരം.
ആട് ജീവിതത്തിന്റെ ചിത്രീകരണത്തിനായി ബ്ലെസിയും പൃഥ്വിരാജും സംഘവും മാര്‍ച്ച് 9- ന് അള്‍ജീരിയയിലേക്ക് തിരിക്കും. മാര്‍ച്ച് 16 മുതല്‍ മേയ് 16 വരെ രണ്ട് മാസത്തെ ചിത്രീകരണമാണ് അള്‍ജീരിയയില്‍ പ്ലാന്‍ ചെയ്തിരിക്കുന്നത്. പൃഥ്വി കഥാപാത്ര തയ്യാറെടുപ്പിനായി മൂന്നു മാസം അഭിനയത്തില്‍ നിന്ന് ഇടവേളയെടുത്ത് മെലിയുകയാണ്. പൃഥ്വിയുടെ പുതിയ ലുക്ക് സോഷ്യല്‍ മീഡിയയിലുടനീളം വൈറലായിരുന്നു.
ബെന്യാമിന്‍ രചിച്ച “ആട് ജീവതം” എന്ന നോവലിന് സിനിമാ ഭാഷ്യം ഒരുക്കുകയാണ് ബ്ലെസ്സി. ബെന്യാമിന്റെ നോവലിനോട് പൂര്‍ണമായും നീതി പാലിക്കുന്ന ചിത്രമായിരിക്കും ആടുജീവിതമെന്ന് ബ്ലെസി പറയുന്നത്. ബിഗ് ബജറ്റ് ചിത്രമായ ആടുജീവിതത്തില്‍ അമലാ പോളാണ് നായിക. നജീബിന്റെ ഭാര്യ സൈനുവായാണ് അമല എത്തുന്നത്. വിനീത് ശ്രീനിവാസന്‍, അപര്‍ണാ ബാലമുരളി, സന്തോഷ് കീഴാറ്റൂര്‍, ലെന തുടങ്ങിയവരും ചിത്രത്തില്‍ മറ്റു പ്രധാന കഥാപാത്രങ്ങളായി എത്തുന്നുണ്ട്. കെ.ജി.എ ഫിലിംസിന്റെ ബാനറില്‍ കെ.ജി അബ്രഹാമാണ് ചിത്രം നിര്‍മ്മിക്കുന്നത്.