ആറു വര്‍ഷത്തെ ഇടവേളയ്ക്കു ശേഷം ടി കെ രാജീവ് കുമാര്‍ സംവിധാനം ചെയ്യുന്ന ചിത്രമാണ് “കോളാമ്പി”. ചിത്രത്തിലെ ആദ്യ ഗാനം പുറത്തിറങ്ങി. “ആരോടും പറയുക വയ്യ…” എന്നു തുടങ്ങുന്ന മനോഹര ഗാനത്തിന്റെ ലെറിക്കല്‍ വീഡിയോയാണ് പുറത്തിറങ്ങിയത്. രമേശ് നാരായണന്‍ സംഗീതം പകര്‍ന്നിരിക്കുന്ന ഗാനം ആലപിച്ചിരിക്കുന്നത് മധുശ്രീ നാരായണ്‍ ആണ്. പ്രഭ വര്‍മ്മയുടേതാണ് വരികള്‍.
നിത്യ മോനാനാണ് ചിത്രത്തില്‍ കേന്ദ്രകഥാപാത്രത്തെ അവതരിപ്പിക്കുന്നത്. തത്സമയം ഒരു പെണ്‍കുട്ടി എന്ന സിനിമക്ക് ശേഷം രാജീവ് കുമാറിന്റെ സിനിമയില്‍ നിത്യ മേനോന്‍ അഭിനയിക്കുന്നു എന്ന പ്രത്യേകതയും ചിത്രത്തിനുണ്ട്. നിര്‍മാല്യം സിനിമയുടെ ബാനറില്‍ രൂപേഷ് ഓമന നിര്‍മ്മിക്കുന്ന ചിത്രത്തില്‍ സിദ്ധാര്‍ത്ഥ് മേനോന്‍, രഞ്ജി പണിക്കര്‍, രോഹിണി, ദിലീഷ് പോത്തന്‍, അരിസ്റ്റോ സുരേഷ് തുടങ്ങിയവര്‍ പ്രധാന വേഷങ്ങളിലെത്തുന്നു.
രവി വര്‍മന്‍ ആണ് ഛായാഗ്രഹണം നിര്‍വ്വഹിച്ചിരിക്കുന്നത്. കലാസംവിധാനം സാബു സിറിളും സംഗീതസംവിധാനം രമേഷ് നാരായണനുമാണ്. ശബ്ദസംവിധാനം നിര്‍വഹിക്കുന്നത് റസൂല്‍ പൂക്കുട്ടിയാണ്. ചിത്രം ഉടന്‍ തിയേറ്ററുകളിലെത്തും.