വിനീത് ശ്രീനിവാസന്‍ നായകനായെത്തിയ ചിത്രം ‘മുകുന്ദന്‍ ഉണ്ണി അസോസിയേറ്റ്സ്’ മികച്ച പ്രതികരണങ്ങളോടെ പ്രദര്‍ശനം തുടരുകയാണ്. നിരവധി സിനിമകളില്‍ എഡിറ്റായി പ്രവര്‍ത്തിച്ച അഭിനവ് സുന്ദര്‍ നായക് ആദ്യമായി സംവിധാനം ചെയ്ത ചിത്രമാണ് മുകുന്ദന്‍ ഉണ്ണി അസോസിയേറ്റ്സ്. സിനിമയെ അഭിനന്ദിച്ച് ഷാജി കൈലാസ് എത്തിയതിന്റെ സന്തോഷം പങ്കുവയ്ക്കുകയാണ് അഭിനവ്.
‘ഇന്നലെ ഷാജി കൈലാസ് മുകുന്ദന്‍ ഉണ്ണി കണ്ടിട്ട് വിളിച്ച്, വളരെയധികം ഇഷ്ടമായെന്ന് പറഞ്ഞു. ഞാന്‍ അദ്ദേഹത്തിന്റെ വലിയ ഫാന്‍ ആണെന്ന് പറഞ്ഞപ്പോള്‍, അദ്ദേഹം എന്നോട് ഇങ്ങോട്ട് ‘ഞാന്‍ ഇപ്പൊ തന്റെ ഫാന്‍ ആടോ’ എന്നു പറഞ്ഞു. കേള്‍ക്കാന്‍ സുഖം ഉണ്ടായിരുന്നു. ആ കോള്‍ എനിക്ക് വളരെ സ്പെഷ്യല്‍ ആയിരുന്നു’, അഭിനവ് കുറിച്ചു.
വിനീത് ശ്രീനിവാസന്‍ ആണ് ചിത്രത്തിലെ കേന്ദ്ര കഥാപാത്രമായ മുകുന്ദന്‍ ഉണ്ണിയെ അവതരിപ്പിക്കുന്നത്. വിനീതിന് പുറമേ സുരാജ് വെഞ്ഞാറമ്മൂട്, സുധി കോപ്പ , തന്‍വിറാം, ജഗദീഷ് , മണികണ്ഠന്‍ പട്ടാമ്പി, ബിജു സോപാനം, ജോര്‍ജ്ജ് കോര,ആര്‍ഷ ചാന്ദ്നി ബൈജു , നോബിള്‍ ബാബു തോമസ്, അല്‍ത്താഫ് സലിം, റിയാ സൈറ, രഞ്ജിത്ത് ബാലകൃഷ്ണന്‍ എന്നിവരും ചിത്രത്തില്‍ മറ്റു പ്രധാന കഥാപാത്രങ്ങളെ അവതരിപ്പിക്കുന്നു.
വിമല്‍ ഗോപാലകൃഷ്ണനും അഭിനവ് സുന്ദര്‍ നായകും ചേര്‍ന്നാണ് ചിത്രത്തിന് തിരക്കഥയൊരുക്കിയിരിക്കുന്നത്. ക്യാമറ വിശ്വജിത്ത് ഒടുക്കത്തില്‍, അഭിനവ് സുന്ദര്‍ നായകും നിധിന്‍ രാജ് അരോളും ചേര്‍ന്നാണ് എഡിറ്റിംഗ്. മനു മഞ്ജിത്ത്, എലിഷ എബ്രഹാം എന്നിവരുടെ വരികള്‍ക്ക് സിബി മാത്യു അലക്സ് ആണ് സംഗീതം പകര്‍ന്നിരിക്കുന്നത്. ജോയി മൂവിസിന്റെ ബാനറില്‍ ഡോക്ടര്‍ അജിത്ത് ജോയിയാണ് ചിത്രം നിര്‍മ്മിച്ചിരിക്കുന്നത്.