ആക്ഷന്‍ ഹീറോ ബിജു എന്ന ഒറ്റ ചിത്രം വഴി പ്രേക്ഷകരുടെ പ്രിയ താരമായി മാറിയ നടിയാണ് മേരി . കോവിഡ് പ്രതിസന്ധി തീര്‍ത്ത ജീവിത പ്രാരാബ്ധം മൂലം ജീവിക്കാനായി ലോട്ടറി വില്‍ക്കാനിറങ്ങിയിരിക്കുകയാണിപ്പോള്‍ നടി. ആക്ഷന്‍ ഹീറോ ബിജുവിന് ശേഷം നിരവധി സിനിമകളില്‍ മേരി വേഷമിട്ടിരുന്നു. എന്നാല്‍ കൊവിഡ് വന്നതോടെ അവസരങ്ങള്‍ ഇല്ലാതായി. മറ്റ് വഴികള്‍ ഇല്ലാതായതോടെയാണ് ലോട്ടറിയുമായി മേരി തെരുവിലേക്ക് ഇറങ്ങിയത്.
മറ്റെന്തെങ്കിലും വഴി നോക്കേണ്ടേ എന്ന് ഓര്‍ത്താണ് താന്‍ ലോട്ടറി കച്ചവടവുമായി തെരുവിലേക്ക് ഇറങ്ങിയയതെന്ന് ഒരു പ്രമുഖ മാധ്യമത്തോട് മേരി പറഞ്ഞു. ചേര്‍ത്തല അരൂര്‍ ദേശീയപാതയ്ക്ക് സമീപമാണ് മേരി ലോട്ടറി വില്‍ക്കുന്നത്.
ആലപ്പുഴ എഴുപുന്ന ചാണിയില്‍ ലക്ഷം വീട് കോളനിയില്‍ താമസിക്കുന്ന നടി സിനിമയില്‍ കൂടുതല്‍ അവസരങ്ങള്‍ കിട്ടുമെന്ന പ്രതീക്ഷയിലാണ് പുതിയ വീട് വയ്ക്കാന്‍ ജില്ലാ സഹകരണ ബാങ്കില്‍ നിന്നും മേരി ലോണ്‍ എടുക്കുന്നത്.
തൊഴിലുറപ്പ് ജോലിയ്ക്ക് പോയിരുന്ന സമയത്താണ് ആക്ഷന്‍ ഹീറോ ബിജുവില്‍ അഭിനയിക്കാന്‍ മേരിക്ക് അവസരം ലഭിക്കുന്നത്. മകളെ വിവാഹം കഴിച്ചയച്ചു. ഒപ്പമുള്ള മകന് ആരോഗ്യപരമായ പ്രശ്‌നങ്ങളുണ്ട്. രാവിലെ 6.30ന് വീട്ടില്‍ നിന്നിറങ്ങും. ഉച്ചവരെ ദേശീയപാതയോരത്തെ പൊരിവെയിലത്ത് ലോട്ടറി വില്‍ക്കും. 300 രൂപ വരെയേ കിട്ടൂ.
ആക്ഷകന്‍ ഹീറോ ബിജു കഴിഞ്ഞതോടെ 35 സീനിമകളില്‍ വേഷമിട്ടു. കണ്ണന്‍ ദേവന്‍, ഏഷ്യന്‍ പെയിന്റ് എന്നിങ്ങനെയുള്ള പരസ്യങ്ങളും ചെയ്തിട്ടുണ്ട്.