ലോകേഷ് കനകരാജ് എന്ന സംവിധായകന അടയാളപ്പെടുത്തിയ സിനിമയാണ് ‘കൈതി’. ലോകേഷ് സിനിമാറ്റിക് യൂണിവേഴ്‌സിനും വന്‍ സ്വീകാര്യതയാണ് തമിഴകവും മലയാളി പ്രേക്ഷകരും നല്‍കിയത്. ‘വിക്രം’, ‘ലിയോ’ അടക്കമുള്ള സൂപ്പര്‍ ഹിറ്റ് ചിത്രങ്ങള്‍ ഒരുക്കിയിട്ടുണ്ടെങ്കിലും കാര്‍ത്തി നായകനായി എത്തിയ കൈതി ചിത്രത്തിന്റെ രണ്ടാം ഭാഗത്തിനായാണ് ആരാധകര്‍ കാത്തിരിക്കുന്നത്.
കൈതി രണ്ടാം ഭാഗത്തെ കുറിച്ച് പുതിയൊരു അപ്‌ഡേറ്റ് പങ്കുവച്ചിരിക്കുകയാണ് നടന്‍ കാര്‍ത്തി ഇപ്പോള്‍. ഒരു പൊതുപരിപാടിയില്‍ സംസാരിക്കവെയാണ് കൈതിയുടെ പുതിയൊരു അപ്‌ഡേറ്റ് കൂടി കാര്‍ത്തി വിട്ടത്. ”ഞാന്‍ ജയിലില്‍ ആയിരുന്നു എന്നല്ലേ നിങ്ങള്‍ അറിഞ്ഞിട്ടുള്ളു, അതിന് മുമ്പ് എന്തായിരുന്നു എന്ന് അറിയില്ലല്ലോ.. അടുത്ത വര്‍ഷം ഷൂട്ട് തുടങ്ങും” എന്നാണ് കാര്‍ത്തി പറഞ്ഞത്.
2019ല്‍ ആണ് കൈതി തിയേറ്ററുകളില്‍ എത്തിയത്. ലോകേഷ് കനകരാജിന്റെയും കാര്‍ത്തിയുടെയും ഏറ്റവും മികച്ച സിനിമകളിലൊന്നായ ‘കൈതി’ ലോകേഷ് സിനിമാറ്റിക് യൂണിവേഴ്‌സിലെയും ആദ്യ സിനിമയാണ്. 2022ല്‍ റിലീസ് ചെയ്ത ‘വിക്രം’ സിനിമയും കൈതിയുടെ തുടര്‍ച്ചയാണ് പറയുന്നത്. ‘ലിയോ’ സിനിമയിലും കൈതി സിനിമയില്‍ നിന്നുള്ള പരാമര്‍ശമുണ്ട്.
ലോകേഷ് യൂണിവേഴ്‌സില്‍ ഇനി വരാനിരിക്കുന്നത് കൈതി 2, റോളക്‌സ്- എ സ്റ്റാര്‍ഡ് എലോണ്‍, വിക്രം 2 എന്നിവയാണെന്ന് ലോകേഷ് ഒരു അഭിമുഖത്തിനിടെ പറഞ്ഞിരുന്നു. ലോകേഷ് സിനിമാറ്റിക് യൂണിവേഴ്‌സിന്റെ ആദ്യ ചിത്രമായ കൈതിയുടെ പത്തിരിട്ടി ബജറ്റിലാണ് രണ്ടാം ഭാഗം ഒരുക്കുന്നതെന്ന് ചിത്രത്തിന്റെ നിര്‍മാതാവ് അറിയിച്ചിരുന്നു.
