കേരള ചലച്ചിത്ര അക്കാദമിയുടെ ചെയര്‍മാന്റെ താല്‍ക്കാലിക ചുമതല ഏറ്റെടുത്ത് പ്രേംകുമാര്‍. അക്കാദമിയുടെ വൈസ് ചെയര്‍മാന്‍ ആയിരുന്നു പ്രേംകുമാര്‍. സംവിധായകരുള്‍പ്പെടെ ചെയര്‍മാനാകാന്‍ നിരവധിപേര്‍ മത്സരിക്കുന്നതിനിടെയാണ് താല്‍ക്കാലിക ചുമതല പ്രേംകുമാറിന് കൈമാറി ചൊവ്വാഴ്ച സര്‍ക്കാര്‍ ഉത്തരവിറക്കി.
എന്നാല്‍ വ്യക്തിപരമായി തനിക്ക് സന്തോഷമില്ല എന്നാണ് പ്രേംകുമാര്‍ പറയുന്നത്. രഞ്ജിത് പ്രിയപ്പെട്ട സുഹൃത്താണ്. അക്കാദമിയുടെ ജനാധിപത്യ സ്വഭാവം കാക്കും. മലയാള സിനിമയില്‍ സ്ത്രീകളുടെ സാന്നിധ്യം ഉറപ്പിക്കാന്‍ പരിശീലന പദ്ധതിയുടെ രണ്ടാം ഘട്ടം ഉടന്‍ ആരംഭിക്കും.
സ്ത്രീ സൗഹൃദ തൊഴിലിടമായി സിനിമ മേഖലയെ മാറ്റും. എന്നാല്‍ സിനിമ കോണ്‍ക്ലേവ് തീയതിയില്‍ അന്തിമ തീരുമാനമായിട്ടില്ല. മറ്റേണ്ടവരെ മാറ്റിനിര്‍ത്തും. സ്ത്രീകളുടെ പോരാട്ടങ്ങള്‍ക്ക് വേദിയുണ്ടാകണം. അക്കാദമിയുടെ തലപ്പത്തേക്ക് വനിത വരണം ആവശ്യപ്പെട്ടിരുന്നു എന്ന് പ്രേംകുമാര്‍ വ്യക്തമാക്കി.
2025 വരെ ജനറല്‍ കൗണ്‍സിലിന് കാലാവധിയുണ്ട്. അതിനുശേഷമേ പുതിയ ചെയര്‍മാനെ നിയമിക്കൂ എന്നാണ് ലഭിക്കുന്ന വിവരം. ആദ്യമായാണ് ഒരു നടന്‍ അക്കാദമി ചെയര്‍മാന്‍ സ്ഥാനത്തേക്ക് എത്തുന്നത്. ദീര്‍ഘകാലമായി അഭിനയരംഗത്തുള്ള പ്രേംകുമാര്‍ കാലിക്കറ്റ് സര്‍വകലാശാലയില്‍നിന്ന് തിയേറ്റര്‍ ആര്‍ട്സിലും കേരള സര്‍വകലാശാലയില്‍നിന്ന് മനഃശാസ്ത്രത്തിലും ബിരുദം നേടിയിട്ടുണ്ട്.
