സിനിമാ-സീരിയില്‍ താരം തുനിഷ ശര്‍മ (20) മരിച്ച നിലയില്‍. ‘ആലിബാബ: ദസ്താന്‍ ഇകാബുള്‍’ എന്ന സീരിയലിന്റെ സെറ്റിലെ മേക്കപ്പ് റൂമില്‍ തൂങ്ങിമരിച്ച നിലയിലാണ് കണ്ടെത്തിയത്. ആശുപത്രിയില്‍ എത്തിച്ച ശേഷം മരണം സ്ഥിരീകരിച്ചതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.
സെറ്റിലെ മേക്കപ്പ് റൂമിലെ ശുചിമുറിയില്‍ ഇന്നലെ ഉച്ച കഴിഞ്ഞ് മൂന്ന് മണിയോടെ പോയ നടി ഏറെ നേരം കഴിഞ്ഞിട്ടും തിരിച്ചെത്തിയില്ല. വാതില്‍ തകര്‍ത്ത് അകത്ത് കയറിയപ്പോഴാണ് തുനിഷയെ തൂങ്ങിമരിച്ച നിലയില്‍ കണ്ടെത്തിയത്. ഉടന്‍ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു.
നടിയുടെ അമ്മയുടെ പരാതിയില്‍ സഹതാരം ഷീസന്‍ മുഹമ്മദ് ഖാനെ പൊലീസ് ചോദ്യം ചെയ്യുകയാണ്. മകളും ഷീസനും തമ്മില്‍ ബന്ധമുണ്ടായിരുന്നു എന്നാണ് അമ്മ പൊലീസിനോട് പറഞ്ഞത്. നടിയുടെ മൊബൈല്‍ ഫോണ്‍ വിശദ പരിശോധനയ്ക്കായി പൊലീസ് കസ്റ്റഡിയിലെടുത്തു.
സെറ്റിലെ സിസിടിവി ദൃശ്യങ്ങളും പൊലീസ് പരിശോധിക്കും. ‘ഭാരത് കാ വീര്‍ പുത്ര മഹാറാണ പ്രതാപ്’ എന്ന സീരിയലിലൂടെയാണ് തുനിഷ ടെലിവിഷന്‍ രംഗത്തെത്തിയത്. ‘ചക്രവര്‍ത്തി അശോക സമ്രാട്ട്’, ‘ഗബ്ബാര്‍ പൂഞ്ച് വാലാ’, ‘ഷേര്‍ഇ പഞ്ചാബ്’, ‘ഇന്റര്‍നെറ്റ് വാലാ ലവ്’, ‘സുബ്ഹാന്‍ അല്ലാ’ തുടങ്ങിയ സീരിയലുകളിലും ശ്രദ്ധേയമായ വേഷങ്ങള്‍ ചെയ്തു.
ബോളിവുഡ് ചിത്രങ്ങളിലും ചെറിയ വേഷങ്ങളില്‍ തുനിഷ പ്രത്യക്ഷപ്പെട്ടിട്ടുണ്ട്. ‘ബാര്‍ ബാര്‍ ദേഖോ’ എന്ന ചിത്രത്തില്‍ കത്രീന കൈഫിന്റെ ചെറുപ്പകാലം അവതരിപ്പിച്ചത് തുനിഷയായിരുന്നു. ‘ഫിത്തൂര്‍’, ‘ദബാങ് 3’, ‘കഹാനി 2’ തുടങ്ങിയ ചിത്രങ്ങളിലും വേഷമിട്ടു.