മറാത്തി സീരിയല്‍ നടി കല്യാണി കുരാലെ ജാദവ് (32) വാഹനാപകടത്തില്‍ മരിച്ചു. സാംഗ്ലി-കോലാപൂര്‍ റോഡില്‍ കോലാപൂര്‍ നഗരത്തിന് സമീപം ഇരുചക്രവാഹനത്തില്‍ സഞ്ചരിക്കവെ ഇവരുടെ വാഹനത്തില്‍ കോണ്‍ക്രീറ്റ് മിക്‌സര്‍ ട്രാക്ടര്‍ ഇടിച്ചാണ് അപകടം ഉണ്ടായത് എന്നാണ് പോലീസ് പറയുന്നത്.
കോലാപൂര്‍ നഗരത്തില്‍ നിന്ന് 20 കിലോമീറ്ററും പൂനെ നഗരത്തില്‍ നിന്ന് 230 കിലോമീറ്ററും അകലെയുള്ള സാംഗ്ലി-കോലാപൂര്‍ റോഡിലെ ഹലോണ്ടി ഗ്രാമത്തില്‍ ശനിയാഴ്ച രാത്രി 11 മണിയോടെയാണ് അപകടം.
കോലാപൂര്‍ സിറ്റിയിലെ രാജരാംപുരി പ്രദേശത്ത് താമസിക്കുന്ന കല്യാണി കുരാലെ അടുത്തിടെ ഹലോണ്ടിയില്‍ ഭക്ഷണശാല ആരംഭിച്ചിരുന്നു.
” രാത്രി റെസ്റ്റോറന്റ് അടച്ച് ജാദവ് വീട്ടിലേക്ക് വരുകയായിരുന്ന ് ഇവരുടെ ഇരുചക്ര വാഹനം ട്രാക്ടര്‍ ഇടിച്ചു തെറിപ്പിച്ചു. ഇടിയുടെ ആഘാതത്തില്‍ നടിക്ക് മാരകമായ പരിക്കുകള്‍ പറ്റി. ട്രാക്ടര്‍ ഡ്രൈവര്‍ക്കെതിരെ കേസ് രജിസ്റ്റര്‍ ചെയ്യുകയും കസ്റ്റഡിയിലെടുക്കുകയും ചെയ്തിട്ടുണ്ട്’ ഷിറോളി പോലീസ് സ്റ്റേഷന്റെ ചുമതലയുള്ള അസിസ്റ്റന്റ് ഇന്‍സ്‌പെക്ടര്‍ സാഗര്‍ പാട്ടീല്‍ പറഞ്ഞു.
തുജ്യാത് ജീവ് രംഗല, ദഖഞ്ച രാജ ജ്യോതിബ തുടങ്ങിയ മറാത്തി ടെലിവിഷന്‍ സീരിയലുകളില്‍ കല്യാണി കുരാലെ ജാദവ് അഭിനയിച്ചിട്ടുണ്ട്.