ബോളിവുഡിലെ താരറാണിയായി ആരാധകരുടെ മാത്രമല്ല നടന്മാരുടെ പോലും ക്രഷ് ആയി മാറിയ നടിയാണ് രേഖ. ഇന്നും ഇഷ്ടനടിമാരെ കുറിച്ച് ചോദിച്ചാല്‍ പലരും രേഖയുടെ പേരായിരിക്കും പറയുക. പഴയ താരപ്രൗഡിയൊക്കെ മങ്ങി തുടങ്ങിയെങ്കിലും നടി ഇന്നും അതുപോലെ സുന്ദരിയായി വാഴുകയാണ്. രേഖയുടെ പരമ്പരാഗത വേഷങ്ങൾ എപ്പോഴും ശ്രദ്ധനേടാറുണ്ട്. അവാർഡ് നിശകൾക്കും വിവാഹച്ചടങ്ങുകൾക്കും മറ്റ് പരിപാടികൾക്കുമെല്ലാം സാരിയും ആഭരണങ്ങളും അണിഞ്ഞ് എത്തുന്ന താരം ഒഴിവാക്കാത്ത ഒന്നാണ് നെറ്റിയിലെ സിന്ദൂരം.
ഇന്ത്യൻ ആചാരങ്ങൾ അനുസരിച്ച് ഭർത്താവ് മരണപ്പെട്ട സ്ത്രീകളും അവിവാഹിതരും സിന്ദൂരം അണിയാറില്ല. ഭർത്താവ് മരണപ്പെട്ടിട്ടും രേഖയുടെ നെറുകയിലെ സിന്ദൂരം എപ്പോഴും ചർച്ചാവിഷയമാകാറുണ്ട്. ബിസിനസുകാരനായ മുകേഷ് അഗർവാളുമായി 1990ലായിരുന്നു രേഖയുടെ വിവാഹം. ഏഴുമാസം മാത്രമാണ് ഇരുവരുടെയും ദാമ്പത്യജീവിതം നീണ്ടത്. മാനസിക ബുദ്ധിമുട്ടുകൾ നേരിട്ടിരുന്ന മുകേഷിൻ്റെ ആത്മഹത്യ രേഖയുടെ ജീവിതത്തെ സാരമായി പിടിച്ചുലച്ചിരുന്നു.
മുകേഷിൻ്റെ കുടുംബത്തിൽ നിന്നും സിനിമാമേഖലയിൽ നിന്നുമടക്കം കുത്തുവാക്കുകൾ നേരിടേണ്ടി വന്നെങ്കിലും രേഖ ബോളിവുഡിൽ തന്റെ താരപദവി ഉറപ്പിക്കുക തന്നെയായിരുന്നു. എന്തുകൊണ്ടാണ് നടി സിന്ദൂരം ഇപ്പോഴും അണിയുന്നതെന്ന് അറിയാമോ? വിവാഹത്തിന് മുൻപും സിനിമാ ലൊക്കേഷനുകൾക്ക് പുറത്ത് രേഖ നെറുകയിൽ സിന്ദൂരം അണിയാറുണ്ടായിരുന്നു. 1980ൽ റിഷി കപൂറിൻ്റെയും നീതു കപൂറിൻ്റെയും വിവാഹച്ചടങ്ങിലാണ് രേഖ ആദ്യമായി സിന്ദൂരം അണിഞ്ഞെത്തിയത്. പരമ്പരാഗത വസ്ത്രങ്ങളിൽ അതീവ സുന്ദരിയായി സിന്ദൂരം തൊട്ടെത്തിയ രേഖ ഏവരെയും ഞെട്ടിച്ചു. ബോളിവുഡ് താരങ്ങളായ അമിതാഭ് ബച്ചൻ, ജയ ബച്ചൻ, കപൂർ കുടുംബം അടക്കം ചടങ്ങിൽ സന്നിഹിതരായിരുന്നു.
സിനിമാ ചിത്രീകരണത്തിനായി സിന്ദൂരം തൊട്ടതാണെന്നും അത് പിന്നീട് മായ്ക്കാൻ മറന്നതാണെന്നുമാണ്
അന്ന് രേഖ ചോദ്യങ്ങൾക്ക് മറുപടി നൽകിയത്. 1982ൽ അന്നത്തെ ഇന്ത്യൻ പ്രസിഡൻ്റായിരുന്ന നീലം സഞ്ജീവ റെഡ്ഡിയോടാണ് സിന്ദൂരം അണിയാനുള യഥാർത്ഥ കാരണം രേഖ വെളിപ്പെടുത്തിയത്. ഉമ്രാവു ജാൻ എന്ന സിനിമയിലെ അഭിനയത്തിന് മികച്ച നടിക്കുള്ള പുരസ്‌കാരം പ്രസിഡൻ്റിൽ നിന്ന് ഏറ്റുവാങ്ങവേ നടിയോട് എന്തുകൊണ്ടാണ് സിന്ദൂരം അണിഞ്ഞിരിക്കുന്നതെന്ന് അദ്ദേഹം ചോദിച്ചു. താൻ ജനിച്ച നഗരത്തിൽ സിന്ദൂരം തൊടുന്നത് ഫാഷനാണെന്നായിരുന്നു രേഖയുടെ മറുപടി.
1990ൽ ഭർത്താവ് മുകേഷിൻ്റെ മരണശേഷവും നെറുകയിൽ സിന്ദൂരം തൊടുന്നത് രേഖ തുടർന്നു. 2008ൽ ഒരു മാധ്യമത്തിന് നൽകിയ അഭിമുഖത്തിലും സിന്ദൂരം അണിയുന്നത് തുടരുന്നതിൻ്റെ കാരണം അവർ വിശദീകരിച്ചു. മറ്റുളവരുടെ പ്രതികരണത്തെക്കുറിച്ച് താൻ ബോധവതിയാകാറില്ലെന്നും സിന്ദൂരം അണിയുന്നത് എനിക്ക് അനുയോജ്യമാണെന്നും മനോഹരമാണെന്നും താൻ കരുതുന്നുവെന്നുമായിരുന്നു താരത്തിൻ്റെ മറുപടി.