പഴയകാല നടി രാധയുടെ മകളും നടിയുമായ കാര്‍ത്തകയുടെ വിവാഹം കഴിഞ്ഞ ദിവസമായിരുന്നു. പ്രമുഖ താരങ്ങളടക്കം പങ്കുചേര്‍ന്ന വിവാഹത്തില്‍ എയ്റ്റീസ് കൂട്ടായ്മയില്‍ നിന്നുള്ള താരങ്ങളും ഒത്തുചേര്‍ന്നിരുന്നു. ഈ വിവാഹത്തില്‍ എല്ലാവരുടെയും പ്രത്യേക ശ്രദ്ധ പിടിച്ചുപറ്റിയ ഒരു കുഞ്ഞു താരവും ഉണ്ടായിരുന്നു.

നടിയും സംവിധായികയുമായ രേവതിയുടെ മകള്‍ മഹിയായിരുന്നു ക്യാമറകണ്ണുകളുടെ ശ്രദ്ധാകേന്ദ്രം. രേവതിക്കൊപ്പം പൊതുപരിപാടികളിലൊന്നും മഹി എത്താറില്ല. അതുകൊണ്ട് തന്നെ രേവതി അമ്മയായ വിവരം അധികമാരും അറിഞ്ഞിരുന്നില്ല. താന്‍ ദത്ത് എടുത്ത് വളര്‍ത്തുന്ന കുഞ്ഞല്ല മഹി എന്ന് രേവതി തുറന്നു പറഞ്ഞിട്ടുണ്ട്.

”എനിക്കും സ്‌നേഹിക്കാനൊരാള് വേണം, ഒരു കുട്ടി വേണം എന്ന ആഗ്രഹം ഒരുപാട് കാലമായി ഉണ്ടായിരുന്നു. അത് നടപ്പിലാക്കാനുള്ള ധൈര്യം വന്നത് അടുത്ത കാലത്താണെന്ന് മാത്രം. എന്നിട്ടും സംശയങ്ങളായിരുന്നു. ഒരു ദിവസം പെട്ടന്ന് തീരുമാനമെടുത്തു.”

”ഞാന്‍ കുഞ്ഞിനെ ദത്ത് എടുത്തതാണ്, സറോഗസിയിലൂടെ ലഭിച്ചതാണ് എന്നൊക്കെ കേട്ടു. ഒരു കാര്യം പറയാം. ഇവളെന്റെ സ്വന്തം രക്തമാണ്. ബാക്കിയെല്ലാം സ്വകാര്യമായിരിക്കട്ടേ. എന്റെ ജീവിതത്തിലെ പല കാര്യങ്ങളും നാച്ചുറലായി നടന്നവയല്ല. ഒരുപാട് അലയേണ്ടി വന്നിട്ടുണ്ട്.”

”ഇപ്പോള്‍ എനിക്ക് സമാധാനമാണ്. മഹിയൊന്ന് വലുതാകട്ടെ ഞാന്‍ വീണ്ടും ആക്ടീവ് ആകും” എന്നായിരുന്നു ഒരു അഭിമുഖത്തില്‍ രേവതി പറഞ്ഞത്. ഐവിഎഫ് വഴിയാണ് മകള്‍ പിറന്നതെന്ന് പാരന്റ്‌സര്‍ക്കിള്‍.കോം എന്ന പോര്‍ട്ടലിനോട് രേവതി പ്രതികരിച്ചിരുന്നു.