1998ല്‍ പുറത്തിറങ്ങിയ ശ്രീകൃഷ്ണപുരത്തെ നക്ഷത്രത്തിളക്കം എന്ന സിനിമയിലെ കഥാപാത്രങ്ങള്‍ക്കും കോമഡി രംഗങ്ങള്‍ക്കും ഇന്നും ആരാധകരേറെയുണ്ട്. ട്രോളുകളിലും റീല്‍സിലും സിനിമയിലെ ചില രംഗങ്ങള്‍ ഇന്നും ചിരി പടര്‍ത്തുന്നുണ്ട്. ബിന്ദു പണിക്കര്‍, കെപിഎസി ലളിത, കലാരഞ്ജിനി, നഗ്മ, ജഗതി, ഇന്നസെന്റ്, കൊച്ചിന്‍ ഹനീഫ തുടങ്ങി വന്‍ താരനിര തന്നെ ചിത്രത്തില്‍ ഉണ്ടായിരുന്നു.
ചിത്രത്തില്‍ നഗ്മയ്ക്ക് ശബ്ദം നല്‍കിയത് മലയാളികള്‍ക്ക് ഏറെ പ്രിയപ്പെട്ട മറ്റൊരു നടിയായിരുന്നു. എണ്‍പതുകളിലെ തിളങ്ങുന്ന താരമായിരുന്നു സരിതയാണ് നഗ്മയ്ക്ക് ശബ്ദം നല്‍കിയത്. നടി എന്നതിനൊപ്പം തന്നെ ഡബ്ബിംഗ് ആര്‍ട്ടിസ്റ്റ് എന്ന രീതിയിലും ഏറെ ശ്രദ്ധിക്കപ്പെട്ട താരമാണ് സരിത.
സുഹാസിനി, ശോഭന, സുധാ ചന്ദ്രന്‍, ഭാനുപ്രിയ, വിജയശാന്തി, രാധ, ശരണ്യ, നാദിയ, ജയഭാരതി, ശോഭ, അമല, ശ്രീദേവി, മധുബാല, നഗ്മ, മീന, രമ്യ കൃഷ്ണന്‍, പ്രിയ രാമന്‍, ഉര്‍വശി, റോജ, സൗന്ദര്യ, താബു, സുസ്മിത സെന്‍, ശാലിനി, സിമ്രാന്‍, സ്‌നേഹ, ഖുശ്ബു തുടങ്ങി അമ്പതിലേറെ നായികമാര്‍ക്ക് വിവിധ ഭാഷാ ചിത്രങ്ങളിലായി സരിത ശബ്ദം നല്‍കിയിട്ടുണ്ട്.
കെ ബാലചന്ദര്‍ സംവിധാനം ചെയ്ത തെലുങ്ക് ചിത്രമായ മരോ ചരിത്രയിലൂടെയാണ് സരിത അഭിനയരംഗത്തേക്ക് എത്തിയത്. തമിഴ്, മലയാളം, കന്നഡ, തെലുങ്ക് ഭാഷകളിലായി 250 ലധികം ചിത്രങ്ങളില്‍ സരിത അഭിനയിച്ചിട്ടുണ്ട്. മലയാളത്തില്‍ നടി മമ്മൂട്ടിക്കൊപ്പം അഭിനയിച്ച കാതോടും കാതോരം എന്ന ചിത്രം ഏറെ ശ്രദ്ധിക്കപ്പെട്ടിരുന്നു.
