സിനിമാ-സീരിയല്‍ താരം സ്വാസിക വിവാഹിതയാകുന്നു. ടെലിവിഷന്‍ താരവും മോഡലുമായ പ്രേം ജേക്കബ് ആണ് വരന്‍. പ്രണയവിവാഹമാണ്. ജനുവരി 26ന് തിരുവനന്തപുരത്ത് വിവാഹവും 27ന് കൊച്ചിയില്‍ സുഹൃത്തുക്കള്‍ക്കായി വിവാഹവിരുന്നും സംഘടിപ്പിക്കും.
‘മനം പോലെ മാംഗല്യം’ എന്ന സീരിയലില്‍ ഒന്നിച്ച് അഭിനയിച്ച ശേഷമാണ് സ്വാസികയും പ്രേമും പ്രണയത്തിലാകുന്നത്. ഇരുവരുടെയും ഫോട്ടോഷൂട്ടുകളും ശ്രദ്ധ നേടിയിരുന്നു. തിരുവനന്തപുരം സ്വദേശിയാണ് പ്രേം. വിജയകുമാറിന്റെയും ഗിരിജയുടെയും മകളായ സ്വാസിക മൂവാറ്റുപുഴ സ്വദേശിയാണ്.
View this post on Instagram
‘വൈഗ’ എന്ന തമിഴ് ചിത്രത്തിലൂടെ 2009ല്‍ ആണ് സ്വാസിക അഭിനയരംഗത്തേക്ക് എത്തുന്നത്. 2010ല്‍ പുറത്തിറങ്ങിയ ‘ഫിഡില്‍’ ആണ് ആദ്യ മലയാള സിനിമ. ‘കട്ടപ്പനയിലെ ഋത്വിക് റോഷന്‍’, ‘പൊറിഞ്ചു മറിയം ജോസ്’, ‘ചതുരം’ എന്നീ ചിത്രങ്ങളിലൂടെയാണ് സ്വാസിക ശ്രദ്ധ നേടുന്നത്.
‘വാസന്തി’ എന്ന ചിത്രത്തിന് താരം മികച്ച സഹനടിക്കുള്ള അവാര്‍ഡ് നേടിയിരുന്നു. 2014 മുതലാണ് സ്വാസിക സീരിയലില്‍ അഭിനയിക്കാന്‍ ആരംഭിച്ചത്. മഴവില്‍ മനോരമയില്‍ സംപ്രേഷണം ചെയ്ത ‘ദത്തുപുത്രി’ എന്ന സീരിയലിലാണ് സ്വാസിക ആദ്യമായി അഭിനയിക്കുന്നത്.
അതേസമയം, ‘വിവേകാനന്ദന്‍ വൈറലാണ്’ എന്ന ചിത്രമാണ് താരത്തിന്റെതായി ഇനി റിലീസിന് ഒരുങ്ങുന്നത്. ‘ഉടയോള്‍’, ‘പ്രൈസ് ഓഫ് പൊലീസ്’, ‘ജെന്നിഫര്‍’, ‘വമ്പത്തി’ എന്നീ മലയാള ചിത്രങ്ങളും ‘ലബ്ബര്‍ പന്ത്’ എന്ന തമിഴ് ചിത്രവുമാണ് സ്വാസികയുടെതായി ഒരുങ്ങുന്നത്.