അദ്‌നാന്‍ സമിക്കെതിരെ ഗുരുതര ആരോപണവുമായി സഹോദരന്‍ ജുനൈദ് സമി ഖാന്‍. താന്‍ ഒന്നുമാകാതെ വീട്ടില്‍ ഇരിക്കാന്‍ കാരണം അദ്‌നാന്‍ ആണെന്നും തന്റെ കഴിവിനെ ഭയപ്പെട്ടിരുന്നെന്നും ജുനൈദ് സോഷ്യല്‍ മീഡിയയില്‍ കുറിച്ചു. കുറിപ്പ് വലിയ ചര്‍ച്ചയായതോടെ പോസ്റ്റ് നീക്കം ചെയ്തു.
1969 ആഗസ്റ്റ് 15ന് റാവല്‍പിണ്ടിയിലെ ആശുപത്രിയിലാണ് അദ്‌നാന്‍ സമി ജനിച്ചത്. 1973 ല്‍ അതെ ആശുപത്രിയിലാണ് എന്റേയും ജനനം. എന്നാല്‍ ഇംഗ്ലണ്ടിലാണ് ജനിച്ചതെന്നാണ് സ്വയം അവകാശപ്പെടുന്നത്. അത് പച്ചകള്ളമാണ്. ഇംഗ്ലണ്ടിലെ പരീക്ഷയില്‍ പരാജയപ്പെട്ട അദ്ദേഹം ലാഹോറില്‍ നിന്നാണ് ഡിഗ്രി നേടിയത്. പിന്നീട് അബുദാബിയില്‍ നിന്ന് പ്രൈവറ്റായി എ ലെവല്‍സ് സ്വന്തമാക്കി- ജുനൈദ് പറഞ്ഞു.
അദ്‌നാന്‍ സമി സ്വാര്‍ഥനായ മനുഷ്യനാണ്. ഞാനും പാടുമെന്ന് അയാള്‍ക്ക് അറിയാമായിരുന്നു. സംഗീതപരമായി എന്നെ സഹായിക്കാമായിരുന്നു. പലരും അദ്ദേഹത്തിന്റെ ശബ്ദത്തെക്കാള്‍ മികച്ചത് എന്റേതാണെന്ന് പറഞ്ഞിട്ടുണ്ട്. എന്നാല്‍ സ്വന്തം ഉയര്‍ച്ച മാത്രം നോക്കി.
എന്നെ ഇന്ത്യയില്‍ പരിചയപ്പെടുത്തിയില്ല. കരിയറില്‍ ഞാന്‍ ഉയരത്തില്‍ എത്തുമെന്ന് ഭയപ്പെട്ടോ?. ഇന്ന് ഒന്നും ചെയ്യാനാവാതെ ഞാന്‍ വീട്ടില്‍ ഇരിക്കുന്നു. അതിന്റെ പ്രധാന കാരണം അദ്‌നാന്‍ സമിയാണ്- ജുനൈദ് സോഷ്യല്‍ മീഡിയയില്‍ കുറിച്ചു.