മിന്നല്‍ മുരളിക്ക് ശേഷം ആക്ഷന്‍ ത്രില്ലറുമായി സോഫിയ പോള്‍. ഷെയ്ന്‍ നിഗം നായകനായി നവാഗതനായ നഹാസ് ഹിദായത്ത് സംവിധാനം ചെയ്യുന്ന ‘ആര്‍ ഡി എക്‌സ്’ ആണ് ഒരുങ്ങുന്നത്. ഷെയ്‌നൊപ്പം ആന്റണി വര്‍ഗീസ്, നീരജ് മാധവ് എന്നിവരാണ് പ്രധാന വേഷങ്ങളില്‍ എത്തുന്നത്.
ഒരു പവര്‍ പാക്ക്ഡ് ആക്ഷന്‍ ത്രില്ലറായി ഒരുങ്ങുന്ന സിനിമയുടെ ചിത്രീകരണം ഉടന്‍ ആരംഭിക്കുമെന്നാണ് റിപ്പോര്‍ട്ട്. ചിത്രത്തിന്റെ പോസ്റ്ററും ഷെയ്ന്‍ സോഷ്യല്‍ മീഡിയയില്‍ പങ്കുവച്ചിട്ടുണ്ട്. കെജിഎഫ്, വിക്രം, ബീസ്റ്റ് തുടങ്ങിയ ചിത്രങ്ങളുടെ ആക്ഷന്‍ ഡയറക്ടേഴ്‌സായ അന്‍ബറിവാണ് ചിത്രത്തിന് വേണ്ടി ആക്ഷന്‍ രംഗങ്ങള്‍ ഒരുക്കുന്നത്.
‘മിന്നല്‍ മുരളി’ കൂടാതെ ബാംഗ്ലൂര്‍ ഡേയ്‌സ്, കാട് പൂക്കുന്ന നേരം, മുന്തിരിവള്ളികള്‍ തളിര്‍ക്കുമ്പോള്‍, പടയോട്ടം തുടങ്ങിയ ചിത്രങ്ങളാണ് സോഫിയ പോളിന്റെ ഉടമസ്ഥതയിലുള്ള വീക്കെന്‍ഡ് ബ്ലോക്ക്ബസ്റ്റേഴ്‌സ് നിര്‍മ്മിച്ചിട്ടുള്ളത്.
‘ബര്‍മുഡ’യാണ് ഷെയ്‌നിന്റേതായി ഇനി റിലീസിന് തയ്യാറായിരിക്കുന്ന ചിത്രം. കൂടാതെ ഷെയ്ന്‍ ആദ്യമായി സംവിധാനവും, കഥയും തിരക്കഥയും ക്യാമറയും എഡിറ്റിങ്ങും നിര്‍വഹിക്കുന്ന ഒരു ഷോര്‍ട്ട്ഫിലിമിന്റെ പോസ്റ്റ് പ്രൊഡക്ഷന്‍ വര്‍ക്കിലാണ്. ‘സംവേര്‍’ എന്നാണ് ഹ്രസ്വചിത്രത്തിന്റെ പേര്.