അഖില്‍ അക്കിനേനി ചിത്രം ‘ഏജന്റി’ലെ മമ്മൂട്ടിയുടെ പ്രകടനത്തിനായി ആകാംക്ഷയോടെയുള്ള കാത്തിരിപ്പിലാണ് ആരാധകര്‍. കേണല്‍ മഹാദേവനെന്നാണ് ചിത്രത്തിലെ മമ്മൂട്ടി കഥാപാത്രത്തിന്റെ പേര്. ചിത്രത്തിന് ഗംഭീര പ്രചാരണമാണ് അണിയറക്കാര്‍ ഒരുക്കുന്നത്. ഇന്ന് കോഴിക്കോട് നഗരത്തിലെ എആര്‍സി കോര്‍ണേഷന്‍ തിയേറ്ററില്‍ അന്‍പതു അടി ഉയരത്തിലുള്ള നടന്റെ കട്ട്ഔട്ട് ആണ് ചിത്രത്തിന്റെ കേരളത്തിലെ ഡിസ്ട്രിബ്യുട്ടേഴ്‌സ് ആയ യൂലിന്‍ പ്രൊഡക്ഷന്‍സ് ഉയര്‍ത്തിയത്.
ഏജന്റില്‍ റോ ചീഫ് ആയി മമ്മൂട്ടിയാണ് അഭിനയിക്കുന്നത്. അദ്ദേഹത്തിന്റെ ടീമിലാണ് താനെന്നും അദ്ദേഹവുമായി ഒരുമിച്ചുള്ള ഒരുപാട് ആക്ഷന്‍ രംഗങ്ങള്‍ ഉള്ള ചിത്രമാണ് ഏജന്റെന്നും അഖില്‍ മനസ്സ് തുറന്നു. തെലുഗിലെ യുവതാരം അഖില്‍ അഖിനേനിയും മമ്മൂട്ടിയും ആദ്യമായി ഒരുമിക്കുന്ന ചിത്രം ഏപ്രില്‍ 28ന് മലയാളം, തെലുങ്ക്, ഹിന്ദി, തമിഴ്, കന്നഡ ഭാഷകളില്‍ ലോകവ്യാപകമായി റിലീസ് ചെയ്യും.
സുരേന്ദര്‍ റെഡ്ഡി രചനയും സംവിധാനവും നിര്‍വ്വഹിക്കുന്ന ചിത്രത്തില്‍ നവാഗതയായ സാക്ഷി വൈദ്യ നായികയാണ്. ഹിപ്പോപ്പ് തമിഴന്‍ സംഗീത സംവിധാനം നിര്‍വഹിച്ചിരിക്കുന്ന ചിത്രത്തിന്റെ ക്യാമറ കൈകാര്യം ചെയ്യുന്നത് രാകുല്‍ ഹെരിയനും ചിത്രസംയോജനം ചെയ്തിരിക്കുന്നത് നവീന്‍ നൂലിയുമാണ്.
ആക്ഷന്‍ രംഗങ്ങള്‍ക്ക് ഏറെ പ്രാധാന്യമുള്ള ഈ ചിത്രത്തിന് വേണ്ടി വമ്പന്‍ മേക്കോവറാണ് അഖില്‍ അക്കിനേനി നടത്തിയിരിക്കുന്നത്. ഹൈദരാബാദ്, ഡല്‍ഹി, ഹംഗറി എന്നിവിടങ്ങളിലായി ചിത്രീകരിച്ച ഏജന്റ് എകെ എന്റര്‍ടൈന്‍മെന്റ്സിന്റെയും സുരേന്ദര്‍ 2 സിനിമയുടെയും ബാനറില്‍ രാമബ്രഹ്‌മം സുങ്കരയാണ് നിര്‍മ്മിക്കുന്നത്. പിആര്‍ഓ: പ്രതീഷ് ശേഖര്‍.