സായി പല്ലവി നായികാവേഷം അവതരിപ്പിക്കുന്ന ‘ഗാര്‍ഗി’ സിനിമയുടെ വാര്‍ത്താസമ്മേളനത്തിനിടെ കരഞ്ഞ് ഐശ്വര്യ ലക്ഷ്മി. വേദിയില്‍ കണ്ണുനിറഞ്ഞ ഐശ്വര്യയെ സായി പല്ലവി ആശ്വസിപ്പിച്ചു. ”ഗാര്‍ഗി ഐശ്വര്യയെ സംബന്ധിച്ച് വൈകാരികമായി ബന്ധമുള്ള ഒരു ചിത്രമാണ്. സിനിമ റിലീസാകുന്നതിന്റെ ആനന്ദക്കണ്ണീരാണ് ഇത്’ ഐശ്വര്യയെ ആശ്വസിപ്പിച്ച് സായ് പല്ലവി പറഞ്ഞു.
‘ഗാര്‍ഗി എനിക്ക് ഒരു വൈകാരിക സിനിമയാണ്. അതിന്റെ ആശയം കൊണ്ടല്ല, അതില്‍ ജോലി ചെയ്ത ആളുകളാല്‍. മിടുക്കരായ നിരവധി സാങ്കേതിക പ്രവര്‍ത്തകര്‍ ഈ ചിത്രത്തിലുണ്ട്. പിന്നെ സായ് പല്ലവി അല്ലായിരുന്നെങ്കില്‍ അതൊരിക്കലും ഗാര്‍ഗി ആവുമായിരുന്നില്ല. നിങ്ങള്‍ക്കല്ലാതെ മറ്റാര്‍ക്കും ഇത്ര മനോഹരമായി ഗാര്‍ഗിയെ അവതരിപ്പിക്കാനാവില്ല’.- ഐശ്വര്യ ലക്ഷ്മി പറഞ്ഞു.
രവിചന്ദ്രന്‍ രാമചന്ദ്രന്‍, ഐശ്വര്യ ലക്ഷ്മി, തോമസ് ജോര്‍ജ്, ഗൗതം രാമചന്ദ്രന്‍ എന്നിവര്‍ ചേര്‍ന്നാണ് ഗാര്‍ഗി നിര്‍മിച്ചിരിക്കുന്നത്. മൂന്നുവര്‍ഷത്തോളം നീണ്ട ചിത്രത്തിന്റെ ഓരോ ഘട്ടത്തിലും വലിയ പിന്തുണയുമായി നിന്ന ഒരാള്‍ ഐശ്വര്യ ലക്ഷ്മിയായിരുന്നുവെന്ന് ഗാര്‍ഗിയുടെ സംവിധായകന്‍ ഗൗതം രാമചന്ദ്രന്‍ പറഞ്ഞു.
തമിഴിലും തെലുങ്കിലും ഒരേസമയം റിലീസ് ചെയ്യുന്ന ചിത്രമാണ് ഗാര്‍ഗി. ജൂലൈ 15 നാണ് റിലീസ്.