ആന്റണി വര്‍ഗീസ്-ടിനു പാപ്പച്ചന്‍ ചിത്രം ‘അജഗജാന്തരം’ തിയേറ്ററുകളിലെത്തി. ഗംഭീര ആക്ഷന്‍ സീക്വന്‍സുകളുമായി എത്തിയ ചിത്രത്തിന് സമ്മിശ്ര പ്രതികരണങ്ങളാണ് ലഭിക്കുന്നത്. ”തിരക്കഥ, മേക്കിംഗ്, ബിജിഎം, ഗാനങ്ങള്‍ എല്ലാം കൊള്ളാം. ഒറ്റത്തവണ മാത്രം കണ്ടിരിക്കാവുന്ന ചിത്രം” എന്നാണ് സോഷ്യല്‍ മീഡിയയില്‍ എത്തിയ ഒരു പ്രതികരണം.
”ശരാശരി നിലവാരം പുലര്‍ത്തുന്ന ഫസ്റ്റ് ഹാഫും സെക്കന്‍ഡ് ഹാഫും നല്ല ക്ലൈമാക്‌സും. മികച്ച ഛായാഗ്രഹണം. നടന്‍ എന്ന നിലയില്‍ ആന്റണി മെച്ചപ്പെട്ടു” എന്നാണ് ഒരു പ്രതികരണം. അര്‍ജുന്‍ അശോകന്റെ പ്രകടനത്തെ വാഴ്ത്തിയുള്ള ട്വീറ്റുകളും എത്തുന്നുണ്ട്.
”അജഗജാന്തരം… മരിച്ചു കിടക്കുന്നവരും എഴുന്നേറ്റ് തുള്ളും അജ്ജാതി എനര്‍ജി അര്‍ജുന്‍ ബ്രോ” എന്നാണ് ഒരു ട്വീറ്റ്. ”അടിയോട് അടി… കൂട്ട തല്ല്… പൊടി പറത്തി അടി” എന്നാണ് മറ്റൊരു കമന്റ്. അതേസമയം, ആന്റണി വര്‍ഗീസിന്റെ കരിയറിലെ ഏറ്റവും മുതല്‍ മുടക്കുള്ള ചിത്രമാണ് അജഗജാന്തരം.
ഉത്സവപ്പറമ്പിലേയ്ക്ക് ഒരു ആനയും പാപ്പാനും ഒപ്പം ഒരു കൂട്ടം യുവാക്കളും എത്തുന്നതും തുടര്‍ന്നവിടെ 24 മണിക്കൂറിനുള്ളില്‍ അരങ്ങേറുന്ന ആകാംഷ നിറഞ്ഞ സംഭവങ്ങളുമാണ് ചിത്രത്തിന്റെ പ്രമേയം. ചെമ്പന്‍ വിനോദ് ജോസ്, സാബു മോന്‍, ജാഫര്‍ ഇടുക്കി, രാജേഷ് ശര്‍മ, സുധി കോപ്പ, വിനീത് വിശ്വം, ലുക്മാന്‍, ശ്രീരഞ്ജിനി തുടങ്ങിയവരും അഭിനയിക്കുന്നു.