ശബരിമല സന്നിധാനത്ത് നടന്‍ അജിത്തിന്റെ സിനിമയുടെ ടീസര്‍ ആവശ്യപ്പെട്ട് മുദ്രാവാക്യം വിളിച്ച് തമിഴ്‌നാട്ടില്‍ നിന്നെത്തിയ ആരാധകര്‍. അജിത്തിന്റെ ചിത്രം പതിച്ച ബാനറുമായാണ് സംഘം എത്തിയത്. അജിത്തേ കടവുളേ എന്ന മുദ്രാവാക്യം വിളിച്ചാണ് സംഘം ബാനറുമായി എത്തിയത്.
പുതിയ സിനിമയായ ‘വിടാമുയര്‍ച്ചി’യുടെ ടീസര്‍ ആവശ്യപ്പെട്ടായിരുന്നു ബാനര്‍. റാണിപ്പേട്ടില്‍ നിന്നുള്ള ആരാധകര്‍ എന്നാണ് വിവരം. വീഡിയോ പ്രചരിച്ചതോടെ തമിഴ്‌നാട്ടില്‍ നിന്നടക്കം വലിയ വിമര്‍ശനം ഉയരുന്നുണ്ട്. ക്ഷേത്ര സങ്കേതത്തില്‍ ഇത്തരം പ്രവര്‍ത്തനങ്ങള്‍ അനുവദിക്കരുതെന്നാണ് ആവശ്യം. ദേവസ്വം ബോര്‍ഡും സംഭവം പരിശോധിക്കും.
View this post on InstagramA post shared by Sabarimala _News_Updates_Tamil (@sabarimala_news_updatestamil)
അതേസമയം, അജിത്ത് ചിത്രം വിടാമുയര്‍ച്ചിയുടെ റിലീസ് പ്രതിസന്ധിയിലാണെന്നാണ് വിവരം. കമല്‍ ഹാസന്‍ ചിത്രം ഇന്ത്യന്‍ 2 കനത്ത പരാജയമായി മാറിയതിനാല്‍ വിടാമുയര്‍ച്ചി ഉടനെ റിലീസ് ചെയ്യണ്ട എന്നാണ് നിര്‍മ്മാതാക്കളായ ലൈക പ്രൊഡക്ഷന്‍സിന്റെ തീരുമാനം. മഗിഴ് തിരുമേനി ഒരുക്കുന്ന ചിത്രത്തില്‍ തൃഷയാണ് നായികയാവുന്നത്.
എന്നാല്‍ സിനിമയുടെ അപ്‌ഡേറ്റുകളോ ടീസറോ ഇതുവരെ പുറത്തുവിട്ടിട്ടില്ല. 2022ല്‍ പുറത്തിറങ്ങിയ അജിത്ത് ചിത്രം ‘വലിമൈ’യ്ക്ക് ശേഷം പ്രഖ്യാപിച്ച ചിത്രമാണ് വിടാമുയര്‍ച്ചി. അടുത്ത വര്‍ഷം പൊങ്കല്‍ റിലീസായാണ് ചിത്രം തിയേറ്ററുകളിലേക്ക് എത്തുക എന്നാണ് വിവരം.