അല്ലു അര്‍ജുനെ കുറിച്ച് തുടര്‍ച്ചയായി വ്യാജ വാര്‍ത്ത പ്രചരിപ്പിച്ച യൂട്യൂബ് ചാനലിനെതിരെ പ്രതിഷേധവുമായി ആരാധകര്‍. നടനെ കുറിച്ചുള്ള നെഗറ്റീവ് വീഡിയോകള്‍ പ്രചരിപ്പിച്ച ഹൈദരാബാദിലെ സ്വകാര്യ യൂട്യൂബ് ചാനലിന്റെ ഓഫിസിലെത്തി, ചാനലിന്റെ ഉടമയെ കൊണ്ട് താരത്തിനോട് ക്ഷമാപണം നടത്തിക്കുകയും ചെയ്തു.
റെഡ് ടിവി എന്ന വിവാദ യൂട്യൂബ് ചാനല്‍ കഴിഞ്ഞ കുറച്ച് മാസങ്ങളായി അല്ലു അര്‍ജുനെതിരെയും നടന്റെ ഭാര്യക്കെതിരെയും മോശം വീഡിയോകള്‍ അപ്‌ലോഡ് ചെയ്തിരുന്നു. മോര്‍ഫ് ചെയ്ത താരത്തിന്റെ അശ്ലീല ചിത്രങ്ങള്‍ ഉള്‍പ്പെടുത്തിയ വീഡിയോകളായിരുന്നു ചാനല്‍ പോസ്റ്റ് ചെയ്തിരുന്നത്.
ഇതിനെതിരെയാണ് ആരാധകരുടെ ഇടപെടല്‍. തുടര്‍ന്ന്, അത്തരം വീഡിയോകള്‍ നീക്കം ചെയ്യുകയും ചെയ്തു. അല്ലു ആരാധകര്‍ യൂട്യൂബ് ചാനല്‍ ഉപരോധിക്കുന്നതിന്റെ വീഡിയോ സോഷ്യല്‍ മീഡിയയില്‍ വൈറലായിരിക്കുകയാണ്. ആരാധകരുടെ ഈ ഇടപെടലിനെ പ്രശംസിക്കുകയാണ് പലരും.
ഇത്തരം പ്രവര്‍ത്തനങ്ങള്‍ ആവര്‍ത്തിച്ചാല്‍ ഒരിക്കലും വെച്ചുപൊറുപ്പിക്കില്ലെന്ന് അല്ലു അര്‍ജുന്റെ ആരാധകര്‍ ചാനല്‍ അധികൃതര്‍ക്ക് മുന്നറിയിപ്പ് നല്‍കിയിട്ടുണ്ട്. എന്നാല്‍ ഈ സംഭവത്തെ കുറിച്ച് ഇതുവരെ അല്ലു അര്‍ജുന്‍ പ്രതികരിച്ചിട്ടില്ല. അതേസമയം, പുഷ്പ 2 ആണ് താരത്തിന്റെതായി ഇനി റിലീസിന് ഒരുങ്ങുന്നത്.