മമ്മൂട്ടി അമല്‍ നീരദ് ചിത്രം ഭീഷ്മ പര്‍വ്വം സൂപ്പര്‍ ഹിറ്റായി മാറിയിരിക്കുകയാണ്. കരിയറിലെ ഏറ്റവും വലിയ വിജയമാണ് ഭീഷ്മ പര്‍വ്വം അദ്ദേഹത്തിന് നേടിക്കൊടുത്തത്. പുലിമുരുകന്‍, ലൂസിഫര്‍, കുറുപ്പ് എന്നിവ കഴിഞ്ഞാല്‍ ഇന്ന് മലയാളത്തിലെ ഏറ്റവും വലിയ പണം വാരി പടവും ഭീഷ്മ പര്‍വ്വം ആണ്. എന്നാല്‍ ഇപ്പോള്‍ ആരാധകര്‍ തേടി നടക്കുന്നത് , ബിഗ് ബിയുടെ രണ്ടാം ഭാഗമായ, ബിലാല്‍ എന്ന് വരുമെന്നാണ്. കാരണം, 2017 ഇല്‍ പ്രഖ്യാപിച്ച ബിലാല്‍, 2020 മാര്‍ച്ചില്‍ തുടങ്ങാന്‍ ഇരുന്നപ്പോഴാണ് കോവിഡ് സാഹചര്യം വന്നത്.
തന്നെ ബിലാല്‍ അപ്പോള്‍ ഷൂട്ട് ചെയ്യാന്‍ സാധ്യമല്ലായിരുന്നു. അങ്ങനെ ആണ് ഭീഷ്മ പര്‍വ്വം എന്ന ചിത്രത്തിലേക്ക് എത്തുന്നതും അതൊരുക്കുന്നതും. ബിലാല്‍ ഇനി എന്ന് വരുമെന്ന ചോദ്യത്തിന് ഇപ്പോള്‍ അമല്‍ നീരദ് ഉത്തരം നല്‍കിയിരിക്കുകയാണ്.
ഭീഷ്മ വലിയ ചിലവേറിയ ചിത്രം ആയിരുന്നത് കൊണ്ട് തന്നെ, ഇനി കുറെ നാള്‍ ഒന്നും ചെയ്യാതെ സ്വസ്ഥമായി ഇരുന്നതിനു ശേഷമേ അടുത്ത പടത്തെ കുറിച്ച് ചിന്തിക്കുന്നുള്ളു എന്നും, ബിലാല്‍ അല്ലാതെ മമ്മൂക്കയുമായി പുതിയ കുറച്ചു സിനിമകള്‍ ചെയ്യാനാണ് തനിക്കു ആഗ്രഹം എന്നും അമല്‍ നീരദ് പറയുന്നു.
ഇതുവരെ കാണാത്ത മമ്മൂക്കയെ അവതരിപ്പിക്കണം എന്നാണ് ഏതൊരു സംവിധായകനെയും പോലെ താനും ആഗ്രഹിക്കുന്നത് എന്നും ബിലാലിന്റെ തിരക്കഥ രണ്ടു വര്‍ഷം മുമ്പ് പൂര്‍ത്തിയാക്കിയതാണ് എങ്കിലും അതില്‍ ഇനി കുറെ തിരുത്തലുകള്‍ വേണ്ടി വരുമെന്നും അമല്‍ നീരദ് മനോരമയുമായുള്ള അഭിമുഖത്തില്‍ പറഞ്ഞു.
