മുംബൈയിലെ പ്രതീക്ഷ എന്ന പേരുള്ള 50 കോടി വിലമതിക്കുന്ന തന്റെ ആഡംബര ബംഗ്ലാവ് മകൾ ശ്വേതയ്ക്ക് സമ്മാനിച്ച് ബോളിവുഡ് സൂപ്പർ താരം അമിതാഭ് ബച്ചൻ.
ഏകദേശം 50.63 കോടി രൂപ വിലവരുന്ന ബംഗ്ലാവിന്‍റെ ഉടമസ്ഥാവകാശ കൈമാറ്റം, 50.65 ലക്ഷം രൂപ സ്റ്റാമ്പ് ഡ്യൂട്ടി അടച്ചു കൊണ്ടാണ് അമിതാഭ് ബച്ചൻ പൂർത്തിയാക്കിയത്.
16,840 ചതുരശ്ര അടി വിസ്തീര്‍ണമുള്ള ബംഗ്ലാവ് രണ്ട് പ്ലോട്ടുകളിലായാണ് വ്യാപിച്ചുകിടക്കുന്നത്. 9,585 ചതുരശ്ര അടിയിലുള്ള ആദ്യത്തെ സ്ഥലം അമിതാഭ് ബച്ചന്റേയും ജയാ ബച്ചന്റേയും പേരിലുള്ളതാണ്. 7,255 ചതുരശ്ര അടിയില്‍ പരന്നുകിടക്കുന്ന രണ്ടാമത്തെ സഥലം അമിതാഭിന്റെ മാത്രം പേരിലുള്ളതുമാണ്.
കുടുംബത്തിലെ മറ്റെല്ലാവരും അഭിനയ രംഗം തിരഞ്ഞെടുത്തപ്പോൾ മോഡലിങ്ങും എഴുത്തുമാണ് ബച്ചന്റെ മകൾ ശ്വേത തിരഞ്ഞെടുത്തത്. ഹിന്ദി ചലച്ചിത്ര നടനും നിർമ്മാതാവുമായിരുന്ന രാജ് കപൂറിന്റെ മകൾ റിതു നന്ദയുടെ മകനും എസ്കോർട്ട്സ് ഗ്രൂപ്പ് ഉടമയുമായ നിഖിൽ നന്ദയാണ് ശ്വേതയുടെ ജീവിത പങ്കാളി.
Read more
മുംബൈയിലെ തന്നെ ജൽസ എന്ന വീട്ടിലാണ് അമിതാഭ് ബച്ചനും കുടുംബവും നിലവിൽ താമസിക്കുന്നത്. അച്ഛനെയും അമ്മയെയും പിരിഞ്ഞിരിക്കാൻ കഴിയാത്തതിനാൽ അഭിഷേക് ബച്ചനും ഭാര്യ ഐശ്വര്യ റായിയും ഇവിടെയാണ് താമസിക്കുന്നത്. 100 കോടിക്ക് മുകളിൽ വിലവരുന്ന വീടിന്റെ അനന്തരാവകാശി അഭിഷേക് തന്നെയാണ് എന്നാണ് പുറത്തുവരുന്ന റിപ്പോർട്ടുകൾ.
