മലയാള സിനിമയിലെ താരസംഘടനയായ ‘അമ്മ’യുടെ ഭാരവാഹി തിരഞ്ഞെടുപ്പ് ഇന്ന്. കൊച്ചിയില്‍ നടക്കുന്ന വാര്‍ഷിക പൊതുയോഗത്തിലാണ് തിരഞ്ഞെടുപ്പ്. പ്രസിഡന്റ് സ്ഥാനത്തേക്ക് മോഹന്‍ലാലും, ട്രഷറര്‍ സ്ഥാനത്തേക്ക് ഉണ്ണി മുകുന്ദനും എതിരില്ലാതെ തിരഞ്ഞെടുക്കപ്പെട്ടിരുന്നു.
കഴിഞ്ഞ 25 വര്‍ഷമായി ജനറല്‍ സെക്രട്ടറിയായിരുന്ന ഇടവേള ബാബു സ്ഥാനമൊഴിയുന്നു എന്നതാണ് ഇത്തവണ നടക്കുന്ന അമ്മ സംഘടന തിരഞ്ഞെടുപ്പിന്റെ പ്രത്യേകത. സിദ്ധിഖ്, ഉണ്ണി ശിവപാല്‍, കുക്കു പരമേശ്വരന്‍ എന്നിവരാണ് ജനറല്‍ സെക്രട്ടറി സ്ഥാനത്തേയ്ക്ക് പത്രിക നല്‍കിയിരിക്കുന്നത്.
അമ്മയുടെ നിലവിലെ ട്രഷററായ സിദ്ദിഖിന്റെ കാലാവധി ജൂണ്‍ 30ന് പൂര്‍ത്തിയാകും. ഈ സ്ഥാനത്തേക്ക് നാമനിര്‍ദേശ പത്രിക സമര്‍പ്പിച്ച ഏക വ്യക്തിയായതിനാല്‍ പുതിയ ഭാരവാഹിയായി ഉണ്ണി മുകുന്ദന്‍ സ്ഥാനമേല്‍ക്കും. വൈസ് പ്രസിഡന്റ് സ്ഥാനത്തേക്ക് ജഗദീഷനെ കൂടാതെ മഞ്ജു പിള്ള, ചേര്‍ത്തല ജയന്‍ എന്നിവരാണ് മത്സര രംഗത്തുള്ളത്.
സെക്രട്ടറി സ്ഥാനത്തേക്ക് ബാബുരാജ്, അനൂപ് ചന്ദ്രന്‍ എന്നിവരും മത്സരിക്കുന്നു. എക്സിക്യൂട്ടീവ് കമ്മിറ്റിയിലേക്ക് വനിതകള്‍ ഉള്‍പ്പെടെ 15 പേരും പത്രിക നല്‍കിയിട്ടുണ്ട്. എക്സിക്യൂട്ടീവ് കമ്മിറ്റി അംഗങ്ങളുടെ 11 തസ്തികകളിലായി 12 പേരാണ് മത്സരരംഗത്തുള്ളത്. ടൊവിനോ തോമസൊഴികെ കാലാവധി പൂര്‍ത്തിയാക്കിയ കമ്മറ്റിയില്‍ നിന്ന് ആരും ഇത്തവണ മത്സരിക്കുന്നില്ല.