ബാല വിവാഹിതനായതോടെ ആശ്വാസം നിറഞ്ഞ ചിരിയുമായി നടന്റെ മുന്‍ഭാര്യമാരായ ഗായിക അമൃത സുരേഷും ഡോക്ടര്‍ എലിസബത്തും. ഇന്ന് രാവിലെ 8.30 എറണാകുളം കലൂര്‍ പാവക്കുളം ക്ഷേത്രത്തില്‍ വച്ചാണ് ബാല അമ്മാവന്റെ മകളായ കോകിലയെ വിവാഹം ചെയ്തത്. ഇതിന് പിന്നാലെ അമൃതയും എലിസബത്തും പങ്കുവച്ച സോഷ്യല്‍ മീഡിയ പോസ്റ്റുകളാണ് ശ്രദ്ധ നേടുന്നത്.
ക്ഷേത്രത്തില്‍ നിന്നും പ്രാര്‍ഥനയ്ക്ക് ശേഷം പ്രസാദവും വാങ്ങി പുറത്തിറങ്ങുന്ന ചിത്രമാണ് അമൃത പങ്കുവച്ചത്. കൂപ്പുകൈ ഇമോജിയും ചേര്‍ത്താണ് ഈ ചിത്രം അമൃത ഫെയ്‌സ്ബുക്കില്‍ പങ്കുവച്ചിരിക്കുന്നത്. ‘സ്‌നേഹവും പ്രാര്‍ഥനകളും’ എന്നെഴുതി മറ്റൊരു ചിത്രം ഇന്‍സ്റ്റഗ്രാമിലും പങ്കുവച്ചിട്ടുണ്ട്.
ബാലയുടെ പേരില്‍ അമൃത നല്‍കിയ പരാതിയും തുടര്‍ന്നുണ്ടായ വിവാദങ്ങളും കഴിഞ്ഞ ദിവസങ്ങളില്‍ വാര്‍ത്തകളില്‍ നിറഞ്ഞു നിന്നിരുന്നു. അമൃത നല്‍കിയ പരാതിയില്‍ ബാല അറസ്റ്റിലാവുകയും ചെയ്തിരുന്നു. അതേസമയം, ചിരിയോടെയുള്ള എലിസബത്തിന്റെ ചിത്രവും ശ്രദ്ധ നേടുകയാണ്. എലിസബത്ത് രണ്ട് മുന്നേ പങ്കുവച്ച ചിത്രമാണെങ്കിലും നിരവധി കമന്റുകളാണ് ലഭിക്കുന്നത്.
കന്നടക്കാരിയായ യുവതിയാണ് ബാലയുടെ ആദ്യ ഭാര്യ. നടന്റെ രണ്ടാം ഭാര്യയായ ഗായിക അമൃത സുരേഷ് ആണ് ബാല തനിക്ക് മുമ്പ് മറ്റൊരു വിവാഹം ചെയ്തിരുന്നുവെന്ന കാര്യം വെളിപ്പെടുത്തിയത്. എന്നാല്‍ ആദ്യ വിവാഹം നിയമപരമായി ബാല രജിസ്റ്റര്‍ ചെയ്തിട്ടില്ല. 2019ല്‍ അമൃതയെ ഡിവോഴ്സ് ചെയ്തിരുന്നു.
ഡോക്ടര്‍ എലിസബത്ത് ആണ് നടന്റെ മൂന്നാം ഭാര്യ. 2021 സെപ്റ്റംബറിലായിരുന്നു ബാലയും എലിസബത്തും വിവാഹിതരായത്. എന്നാല്‍ ആ വിവാഹവും നിയമപരമായി റജിസ്റ്റര്‍ ചെയ്തിരുന്നില്ല. ബാലയുടെ പ്രതിസന്ധി ഘട്ടങ്ങളില്‍ ഒന്നിച്ചുണ്ടായിരുന്ന എലിസബത്തിനെ പിന്നീട് കാണാതാവുകയായിരുന്നു. നിലവില്‍ ഗുജറാത്തില്‍ ജോലി ചെയ്യുകയാണ് എലിസബത്ത്.