2020 നല്‍കിയ നഷ്ടങ്ങളുടെ പട്ടികയിലേക്ക് നടന്‍ അനില്‍ നെടുമങ്ങാടിന്റെ പേരും എഴുതപ്പെട്ടിരിക്കുകയാണ്. താരത്തിന്റെ അപ്രതീക്ഷിത വിയോഗം ഏല്‍പ്പിച്ച ഞെട്ടലിലാണ് സിനിമാലോകവും പ്രേക്ഷകരും. നടി കനി കുസൃതിയോട് രണ്ടു വര്‍ഷം മുമ്പ് അനില്‍ പറഞ്ഞ വാക്കുകളാണ് ആരാധകരെ വീണ്ടും വേദനയില്‍ ആഴ്ത്തിയിരിക്കുന്നത്.
2018-ല്‍ കനിയുമായി നടത്തിയ ചാറ്റിന്റെ സ്‌ക്രീന്‍ ഷോട്ട് നടന്‍ ഫെയ്‌സ്ബുക്കില്‍ പങ്കുവെച്ചിരുന്നു. അനില്‍ മരിച്ചതായി കനി സ്വപ്‌നം കണ്ടതും ഇക്കാര്യം അദ്ദേഹത്തോട് പറഞ്ഞതുമാണ് ചാറ്റിലുള്ളത്. “”മരണമെത്തുന്ന നേരത്തെങ്കിലും അരികത്ത് വരുമോ പൊന്നേ… പേടിക്കണ്ട നീ വന്നിട്ടേ ചാകു”” എന്ന ക്യാപ്ഷനോടെയാണ് അന്ന് അനില്‍ ഈ ചാറ്റ് പങ്കുവെച്ചത്.
അനിലേട്ടാ.. എന്ന ക്യാപ്ഷനോടെ ഈ പോസ്റ്റ് പങ്കുവെച്ചിരിക്കുകയാണ് കനി. അയ്യപ്പനും കോശിയും സിനിമയിലെ വേഷത്തിലൂടെ മുഖ്യധാരാ സിനിമയില്‍ ഏറെ പ്രതീക്ഷയുണര്‍ത്തിയ നടനായിരുന്നു അനില്‍. നാടകത്തിലൂടെയാണ് താരം അഭിനയരംഗത്തേക്ക് എത്തിയത്. തുടര്‍ന്ന് ടെലിവിഷനിലും സജീവമായി.
പാവാട, കമ്മട്ടിപ്പാടം, പാപം ചെയ്യാത്തവര്‍ കല്ലെറിയട്ടെ, തെളിവ് തുടങ്ങിയ ചിത്രങ്ങളിലും താരം മികച്ച കഥാപാത്രങ്ങള്‍ അവതരിപ്പിച്ചു. ജോജു ജോര്‍ജ് ചിത്രം പീസിന്റെ ഷൂട്ടിംഗിനായാണ് അനില്‍ തൊടുപുഴയില്‍ എത്തിയത്. ഷൂട്ടിംഗ് ഇടവേളയില്‍ സുഹൃത്തുക്കള്‍ക്കൊപ്പം ജലാശയത്തില്‍ കുളിക്കാനിറങ്ങിയ താരം ആഴമുള്ള കയത്തിലേക്ക് അബദ്ധത്തില്‍ വീണു പോവുകയായിരുന്നു.