സത്യന്‍ അന്തിക്കാടിന്റെ പാത പിന്തുടര്‍ന്ന് സംവിധാന രംഗത്തു ഇപ്പോള്‍ തന്റെ മുദ്ര പതിപ്പിച്ചിരിക്കുകയാണ് അനൂപ് സത്യനും. അനൂപ് രചിച്ചു സംവിധാനം ചെയ്ത ആദ്യ ചിത്രമായ വരനെ ആവശ്യമുണ്ട് ഇപ്പോള്‍ മികച്ച പ്രേക്ഷക പ്രതികരണം നേടി മുന്നേറുകയാണ്. ഇപ്പോഴിതാ കോഴിക്കോട് മെഡിക്കല്‍ കോളേജില്‍ വെച്ചു നടന്ന ഒരു പരിപാടിയില്‍ വെച്ചു തനിക്കു ഏറ്റവും കൂടുതല്‍ ഇഷ്ട്ടപ്പെട്ട, അച്ഛന്‍ സംവിധാനം ചെയ്ത ചിത്രമേതെന്നു വെളിപ്പെടുത്തിയിരിക്കുകയാണ് അനൂപ് സത്യന്‍.
അച്ഛന്‍ സംവിധാനം ചെയ്ത തന്റെ ഏറ്റവും പ്രീയപ്പെട്ട ചിത്രം നാടോടിക്കാറ്റ് ആണെന്നാണ് അനൂപ് പറയുന്നത്. തങ്ങള്‍ ഏറ്റവും കൂടുതല്‍ കണ്ട ചിത്രമതാണെന്നും അതിലെ ഓരോ സീനും ഡയലോഗും വരെ കാണാപാഠമാണെന്നും അനൂപ് സത്യന്‍ പറയുന്നു.
കൂടാതെ സന്ദേശം, പൊന്മുട്ടയിടുന്ന താറാവ് എന്നീ ചിത്രങ്ങളും തന്റെ ഫേവറിറ്റാണെന്നും അനൂപ് പറഞ്ഞു. മോഹന്‍ലാല്‍ നായകനായി ശ്രീനിവാസന്‍ രചിച്ചു സത്യന്‍ അന്തിക്കാട് സംവിധാനം ചെയ്ത ചിത്രമാണ് നാടോടിക്കാറ്റ്. തിലകന്‍, ജയറാം, ശ്രീനിവാസന്‍ എന്നിവര്‍ പ്രധാന വേഷങ്ങള്‍ ചെയ്ത സത്യന്‍ അന്തിക്കാട് ചിത്രമാണ് സന്ദേശം. ഈ ചിത്രം രചിച്ചതും ശ്രീനിവാസനാണ്. രഘുനാഥ് പാലേരി രചിച്ച സത്യന്‍ അന്തിക്കാട് ചിത്രമാണ് പൊന്മുട്ടയിടുന്ന താറാവ്.
