തൃശൂര്‍ ഐനോക്‌സ് തിയേറ്ററിലെ ടിക്കറ്റ് കൗണ്ടറിനു മുന്നിലെത്തിയ ചെറുപ്പക്കാരന്‍ കണ്ടത് സ്‌ക്രീനില്‍ “വരനെ ആവശ്യമുണ്ട്” എന്ന സിനിമയുടെ ടിക്കറ്റുകള്‍ എല്ലാ വിറ്റുതീര്‍ന്നുവെന്നു എഴുതിവെച്ചിരിക്കുന്നതാണ്.
പതിവു 5 ഷോയ്ക്കു പകരം അവിടെ 9 ഷോ കളിക്കുന്നുണ്ടായിരുന്നു. ടിക്കറ്റ് ഇല്ലെന്ന ബോര്‍ഡ് സാധാരണ നിലയില്‍ നിരാശപ്പെടുത്തേണ്ടതാണ്. എന്നാല്‍ അത് ആ യുവാവിനെ സന്തോഷിപ്പിക്കുകയാണ് ചെയ്തത് കാരണം അയാള്‍ക്കു ടിക്കറ്റ് ആവശ്യമില്ലായിരുന്നു.
ടിക്കറ്റില്ലെന്നു കാണിക്കുന്ന ബോര്‍ഡുകളുടെ പടമെടുത്തുകൊണ്ടു നിന്ന ചെറുപ്പക്കാരനെ പ്രേക്ഷകരില്‍ ചിലര്‍ തിരിച്ചറിഞ്ഞു. സംവിധായകന്‍ അനൂപ് സത്യന്‍! വരനെ ആവശ്യമുണ്ട് കണ്ടറിങ്ങിയ പലരും വന്ന് അഭിനന്ദിച്ചു.