മലയാളിയും മോഡലുമായ ശ്രീലക്ഷ്മി സതീഷിന്റെ ഏറ്റവും പുതിയ ചിത്രമാണ് രാം ഗോപാൽ വർമ്മ അവതരിപ്പിക്കുന്ന ‘സാരി’. ഏതാനും മാസങ്ങൾക്ക് മുൻപ് ശ്രീലക്ഷ്മി സതീഷിന്റെ(ആരാധ്യ ദേവി) ഫോട്ടോ ബോളിവുഡ് സംവിധായകൻ രാം ഗോപാൽ വർമ പങ്കുവച്ചത് ഏറെ ശ്രദ്ധനേടിയിരുന്നു. ഇതിന് പിന്നാലെ നിരവധി ട്രോളുകളും പരിഹാസങ്ങളുമാണ് ഇരുവർക്കുമെതിരെ ഉയർന്നത്. അന്ന് ശ്രീലക്ഷ്മിയെ വച്ച് താനൊരു സിനിമ ചെയ്യുമെന്ന് രാം ഗോപാൽ അറിയിച്ചിരുന്നു. വൈകാതെ സിനിമ പ്രഖ്യാപിക്കുകയും ചെയ്തു.
രാംഗോപാൽ വർമ അവതരിപ്പിക്കുന്ന സാരി എന്ന പുതിയ ചിത്രത്തിലൂടെ അദ്ദേഹം പ്രേക്ഷകർക്ക് മുന്നിലേക്കെത്തിച്ചത് രണ്ട് സർപ്രൈസുകളാണ്. ഒന്ന് മലയാളി നായികയായ ആരാധ്യ ദേവിയും രണ്ടാമത്തേത്ത് എ ഐ (AI) വഴി സൃഷ്‌ടിച്ച പാട്ടുകളും. ചിത്രത്തിലെ അത്തരത്തിലൊരു ഗാനത്തിൻ്റെ വീഡിയോ പുറത്തെത്തിയിരിക്കുകയാണിപ്പോൾ.
ചിത്രത്തിൽ സിറാ ശ്രീ എഴുതി ഡി.എസ്.ആർ. ബാലാജി എഴുതി കീർത്തന ശേഷ് ആലപിച്ച ഐ വാണ്ട് ലവ് എന്നൊരു ഗാനമുണ്ട്. ഈ ഗാനത്തിന്റെ AI വേർഷൻ ആണ് ഇപ്പോൾ പുറത്തെത്തിയിരിക്കുന്നത്. യഥാർത്ഥ ഗാനത്തെ AI സഹായത്തോടെ പുതുരൂപത്തിൽ അവതരിപ്പിച്ചിരിക്കുകയാണ് രാംഗോപാൽ വർമയും സംഘവും. അതീവ ഗ്ലാമറസ് ആയി പ്രത്യക്ഷപ്പെടുന്ന ആരാധ്യ ദേവി തന്നെയാണ് പാട്ടിൻ്റെ മുഖ്യ ആകർഷണവും.
സാരി ചുറ്റിയ യുവതിയോട് ഒരു യുവാവിന് തോന്നുന്ന അടങ്ങാത്ത അഭിനിവേശം പിന്നീട് അപകടകരമായി മാറുന്നതിന്റെ കഥയാണ് ചിത്രം പറയുന്നത്. അമിതമായ സ്നേഹം ഭയാനകമാകും എന്നതാണ് ചിത്രത്തിന്റെ ടാഗ് ലൈൻ. നടൻ സത്യാ യാദു അവതരിപ്പിക്കുന്ന കഥാപാത്രം സാരി ചുറ്റിയ ഒരു യുവതിയെ കാണുന്നു. ആരാധ്യ ദേവി അവതരിപ്പിക്കുന്ന ഈ കഥാപാത്രത്തെ അയാൾ പിൻതുടരുകയും അയാളുടെ അവളോടുള്ള വികാരം അപകടകരമായി മാറുന്നതുമാണ് “സാരി” എന്ന ചിത്രം പറയുന്നത്.