ആസിഫ് അലി-ജീത്തു ജോസഫ് കൂട്ടുകെട്ടില്‍ ‘കൂമന്‍’ സിനിമയ്ക്ക് ഗംഭീര പ്രതികരണങ്ങള്‍. ”മലയാളത്തില്‍ ത്രില്ലര്‍ സിനിമകള്‍ എടുക്കാന്‍ തനിക്ക് മുകളില്‍ ആരുമില്ലെന്ന് ഒരിക്കല്‍ കൂടി തെളിയിച്ചിരിക്കുകയാണ് ജീത്തു ജോസഫ്” എന്നാണ് സോഷ്യല്‍ മീഡിയയില്‍ എത്തിയ ഒരു അഭിപ്രായം.
പ്രേക്ഷകര്‍ പ്രതീക്ഷിച്ചിരുന്ന ട്വിസ്റ്റ് ആണെങ്കിലും അന്വേഷണ രീതി, കഥ പുരോഗമിക്കുന്നത് ഒക്കെ വളരെ മികച്ച രീതിയിലാണ് എടുത്തിരിക്കുന്നത്. ആസിഫ് അലിയുടെ മറ്റൊരു കരിയര്‍ ബെസ്റ്റ് എന്നിങ്ങനെയാണ് പ്രേക്ഷകരുടെ പ്രതികരണങ്ങള്‍.
‘ദൃശ്യം’, ’12ത് മാന്‍’ എന്നീ ചിത്രങ്ങള്‍ക്ക് ശേഷം ജീത്തു ജോസഫ് ഒരുക്കിയ ഇന്‍വെസ്റ്റിഗേഷന്‍ ത്രില്ലര്‍ ചിത്രമാണ് കൂമന്‍. മാജിക്ക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫന്‍, അനന്യ ഫിലിംസിന്റെ ബാനറില്‍ ആല്‍വിന്‍ ആന്റണി എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.
രഞ്ജി പണിക്കര്‍, ബാബുരാജ്, മേഘനാഥന്‍, ഹന്നാ രാജികോശി, ആദം അയൂബ്, ബൈജു, ജാഫര്‍ ഇടുക്കി, പൗളി വില്‍സണ്‍, കരാട്ടേ കാര്‍ത്തിക്, ജോര്‍ജ്ജ് മരിയന്‍, രമേശ് തിലക്, പ്രശാന്ത് മുരളി , അഭിരാം രാധാകൃഷ്ണന്‍, രാജേഷ് പറവൂര്‍, ദീപക് പറമ്പോല്‍, ജയിംസ് ഏലിയ, വിനോദ് ബോസ്, പ്രദീപ് പരസ്പരം, റിയാസ് നര്‍മ്മകല എന്നിങ്ങനെ വന്‍ താരനിരയും ചിത്രത്തിലുണ്ട്.
കേരള-കര്‍ണ്ണാടക അതിര്‍ത്തിയിലെ ഒരു മലയോര ഗ്രാമത്തിന്റെ പശ്ചാത്തലത്തിലാണ് ചിത്രത്തിന്റെ കഥ നടക്കുന്നത്. വ്യത്യസ്ത സംസ്‌ക്കാരത്തിലുള്ള ആളുകള്‍ ഒന്നിച്ചു പാര്‍ക്കുന്ന ആ നാട്ടിലെ പോലീസ് സ്റ്റേഷനിലേക്ക് വളരെ കര്‍ക്കശക്കാരനായ ഒരു പോലീസ് ഉദ്യോഗസ്ഥന്‍ സ്ഥലംമാറി എത്തുന്നു.
അയാളുടെ സ്വഭാവം പോലീസ് സ്റ്റേഷനുമായി ബന്ധപ്പെട്ട ആളുകളുടെയും നായകന്റെയും ജീവിതത്തെ കീഴ്മേല്‍ മറിക്കുന്നു. ആ ഗ്രാമത്തിലെ സാധാരണ സംഭവങ്ങള്‍ അസാധാരണമുള്ളതായി മാറുന്നു. അതിന്റെ പിന്നാലെയുള്ള നായകന്റെ യാത്ര കൂടിയാണ് കൂമന്‍.