റോഷാക്കിന്റെ വിജയത്തില്‍ ആസിഫ് അലിക്ക് റോളക്സ് വാച്ച് സമ്മാനമായി നല്‍കി മമ്മൂട്ടി. സിനിമയുടെ വിജയാഘോഷപരിപാടിക്കിടെയാണ് ആസിഫ് അലിയെ ഞെട്ടിച്ച മമ്മൂട്ടിയുടെ സമ്മാനപ്രഖ്യാപനം നടന്നത്. തമിഴ് സിനിമ ‘വിക്രം’ വന്‍ വിജയമായപ്പോള്‍ കമല്‍ഹാസന്‍ സൂര്യയ്ക്ക് റോളക്സ് വാച്ച് വാങ്ങിച്ചുകൊടുത്തിരുന്നല്ലോ എന്ന് പറഞ്ഞാണ് മമ്മൂട്ടി സമ്മാനത്തെക്കുറിച്ച് സൂചന നല്‍കിയത്.
”കമല്‍ഹാസന്‍ സൂര്യയ്ക്ക് റോളക്സ് വാച്ച് നല്‍കിയ വാര്‍ത്ത കണ്ടിരുന്നു. ആ പടത്തിന് 500 കോടിയാണ് കലക്ഷന്‍ കിട്ടിയത്. അതില്‍ നിന്നും പത്തോ പതിനഞ്ചോ ലക്ഷം കൊടുത്ത് ഒരു വാച്ച് മേടിച്ചു കൊടുത്തു. ഞാന്‍ ചുമ്മാ പറഞ്ഞതാണ് കേട്ടോ. ഭയങ്കര വിലയാകും ആ വാച്ചിന്.
ആസിഫ് എന്നോട് ചോദിച്ചത് റോളക്സ് വാച്ച് വാങ്ങിച്ചു തരുമോ എന്നാണ്? റോളക്സ്.”-മമ്മൂട്ടി ഈ ഡയലോഗ് പറഞ്ഞ ശേഷം ഉടനെ വേദിയിലേക്ക് റോളക്സ് വാച്ച് എത്തിക്കുകയായിരുന്നു. ആസിഫ് അലിക്ക് മുഖത്ത് അമ്പരപ്പായിരുന്നു. ‘എന്തെങ്കിലും പറയൂ’ എന്ന് അവതാരക അഭ്യര്‍ഥിച്ചെങ്കിലും സന്തോഷം പ്രകടിപ്പിക്കുക മാത്രം ചെയ്ത് നടന്‍ സ്റ്റേജ് വിട്ടിറങ്ങുകയായിരുന്നു.
റോഷാക്ക് വിജയാഘോഷ വേദി നടന്‍ ദുല്‍ഖര്‍ സല്‍മാന്റെ സാന്നിധ്യം കൊണ്ടും ശ്രദ്ധേയമായി. നേരത്തെ റോഷാക്കിലെ ആസിഫലിയുടെ പ്രകടനത്തെ പ്രശംസിച്ച് മമ്മൂട്ടി രംഗത്തെത്തിയിരുന്നു. നെഗറ്റീവ് ഷെയ്ഡുള്ള ആസിഫ് അലി കഥാപാത്രം മുഖം മറച്ചായിരുന്നു ഈ സിനിമയില്‍ പ്രത്യക്ഷപ്പെട്ടത്.