കമല്‍ഹാസനും രജനീകാന്തും അഭിനയിച്ച “അവള്‍ അപ്പടി താന്‍” എന്ന ചിത്രം റീമേക്കിനൊരുങ്ങുന്നു. 42 വര്‍ഷങ്ങള്‍ക്ക് മുമ്പ്, 1978-ല്‍ പുറത്തിറങ്ങിയ ചിത്രമാണ് ദുല്‍ഖറിനെ നായകനാക്കി റീമേക്ക് ചെയ്യാനൊരുങ്ങുന്നത്. സംവിധായകന്‍ ഹരി വെങ്കടശ്വരനാണ് ചിത്രം റീമേക്ക് ചെയ്യാനൊരുങ്ങുന്നതെന്നാണ് റിപ്പോര്‍ട്ടുകള്‍.
ചിത്രത്തില്‍ നായികയായി ശ്രുതി ഹസന്‍ വേഷമിടും. കമല്‍ഹാസന്‍, രജനികാന്ത്, ശ്രീപ്രിയ എന്നിവരാണ് പഴയ ചിത്രത്തില്‍ കേന്ദ്ര കഥാപാത്രങ്ങളായത്. ശ്രീപ്രിയയുടെ വേഷമാണ് ശ്രുതി ഹസന്‍ അവതരിപ്പിക്കുക. കമല്‍ ഹാസന്‍ അവതരിപ്പിച്ച കഥാപാത്രമാണ് ദുല്‍ഖര്‍ അവതരിപ്പിക്കുക. രജനികാന്ത് അഭിനയിച്ച വേഷം ചിമ്പു അവതരിപ്പിക്കുമെന്നും റിപ്പോര്‍ട്ടുണ്ട്.
സി രുധാരിയ ആണ് അവള്‍ അപ്പടി താന്‍ സിനിമ സംവിധാനം ചെയ്തത്. പ്രണയബന്ധങ്ങളില്‍ ഉണ്ടാവുന്ന ബുദ്ധിമുട്ടുകള്‍ കാരണം പുരുഷവിരോധം ഉണ്ടാവുന്ന യുവതിയുടെ കഥയാണ് സിനിമ പങ്ക് വെച്ചത്. റീമേക്ക് അടുത്ത വര്‍ഷം റിലീസാകുമെന്നാണ് റിപ്പോര്‍ട്ട്.
