ഇന്ത്യന്‍ ബോക്‌സോഫീസില്‍ പുത്തന്‍ റെക്കോര്‍ഡുകള്‍ തീര്‍ത്ത് മുന്നേറുകയാണ് ‘അവതാര്‍: ദ വേ ഓഫ് വാട്ടര്‍’. ഏറ്റവും പുതുതായി പുറത്തുവരുന്ന റിപ്പോര്‍ട്ടുകള്‍ പ്രകാരം ഇന്ത്യന്‍ ബോക്‌സോഫീസില്‍ പുതുചരിത്രം എഴുതിച്ചേര്‍ത്തിരിക്കുകയാണ്് ഈ ജെയിംസ് കാമറൂണ്‍ ചിത്രം. ഇന്ത്യയില്‍ ഏറ്റവും കൂടുതല്‍ കളക്ഷന്‍ നേടുന്ന ഹോളിവുഡ് ചിത്രമായി അവതാര്‍ രണ്ടാം പതിപ്പ് മാറിയിരിക്കുകയാണെന്നാണ് ട്രേഡ് അനലിസ്റ്റുകള്‍ വ്യക്തമാക്കുന്നത്.
ഇന്ത്യന്‍ ബോക്‌സോഫീസില്‍ നിന്ന് 439.50 കോടി രൂപയാണ് ഇതുവരെ നേടിയിരിക്കുന്നതെന്നാണ് പ്രമുഖ ട്രേഡ് അനലിസ്റ്റായ സുമിത് കദേല്‍ ട്വീറ്റ് ചെയ്തത്. മാര്‍വെല്‍ ചിത്രം അവഞ്ചേഴ്‌സ്: എന്‍ഡ്‌ഗെയിമിന്റെ റെക്കോര്‍ഡാണ് അവതാര്‍ തകര്‍ത്തിരിക്കുന്നത്.
എന്‍ഡ് ഗെയിം ഇന്ത്യയില്‍ നിന്ന് നേടിയത് 438 കോടി രൂപ ആണ്. അവതാര്‍ ഇന്ത്യയില്‍ നിന്ന് നേടുന്ന ലൈഫ് ടൈം ബിസിനസ് 480 കോടി രൂപ ആയിരിക്കുമെന്നാണ് സുമിത് കദേലിന്റെ പ്രവചനം. ആഗോള ബോക്‌സോഫീസിലും വലിയ നേട്ടത്തിലേക്കാണ് ദ വേ ഓഫ് വാട്ടര്‍ കടന്നിരിക്കുന്നത്.
5 ബില്യണ്‍ ഡോളര്‍ (12,341 കോടി രൂപ) ആണ് അവതാര്‍ 2 ന്റെ ഇതുവരെയുള്ള കളക്ഷന്‍. സാം വെര്‍ത്തിങ്ടണ്‍, സോയി സാല്‍ഡാന, സ്റ്റീഫന്‍ ലാങ്, സിഗേര്‍ണ്ണി വീവര്‍ എന്നിവര്‍ക്കൊപ്പം കേറ്റ് വിന്‍സ്ലറ്റും അവതാറില്‍ പ്രധാന കഥാപാത്രത്തെ അവതരിപ്പിക്കുന്നുണ്ട്.