ജാനേമന്‍ എന്ന ചിത്രത്തിന് ശേഷം വീണ്ടും നായകനാകാന്‍ ഒരുങ്ങി ബേസില്‍ ജോസഫ്. ‘ജയ ജയ ജയ ജയ ഹേ’ എന്ന ചിത്രത്തിലാണ് ബേസില്‍ അഭിനയിക്കാന്‍ ഒരുങ്ങുന്നത്. വിപിന്‍ ദാസ് സംവിധാനം ചെയ്യുന്ന ചിത്രത്തില്‍ ദര്‍ശന രാജേന്ദ്രന്‍ ആണ് നായിക.
ദര്‍ശന നായികയായ ഹൃദയം ചിത്രം തിയേറ്ററുകളില്‍ മികച്ച പ്രതികരണം നേടുന്നതിനിടെയാണ് പുതിയ ചിത്രം പ്രഖ്യാപിച്ചിരിക്കുന്നത്. ജാനേമന്‍ നിര്‍മിച്ച ചിയേഴ്‌സ് എന്റര്‍ടെയ്ന്‍മെന്റ് തന്നെയാണ് ജയ ജയ ജയ ജയ ഹേയും നിര്‍മ്മിക്കുന്നത്.
എന്നാല്‍ ചിത്രത്തിലെ മറ്റ് അഭിനേതാക്കള്‍ ആരൊക്കെയാകും എന്നോ കൂടുതല്‍ വിവരങ്ങളോ പുറത്തുവിട്ടിട്ടില്ല. അതേസമയം, ബേസില്‍ സംവിധാനം ചെയ്ത മിന്നല്‍ മുരളി ആഗോള ശ്രദ്ധ നേടിയ സാഹചര്യത്തിലാണ് സംവിധായകന്‍ നായകനാകുന്ന സിനിമ പ്രഖ്യാപിച്ചതെന്നതും ശ്രദ്ധേയമാണ്.
നെറ്റ്ഫ്‌ളിക്‌സില്‍ ക്രിസ്മസ് റിലീസായാണ് മിന്നല്‍ മുരളി പ്രദര്‍ശനത്തിന് എത്തിയത്. മലയാളത്തില്‍ ഇതാദ്യമായി ഒരു സൂപ്പര്‍ഹീറോയെ വിശ്വസനീയമായി ബേസില്‍ ജോസഫിന് അവതരിപ്പിക്കാനായി എന്നാണ് അഭിപ്രായങ്ങള്‍. ചിത്രത്തില്‍ ടൊവിനൊയുടെയും ഗുരു സോമസുന്ദരത്തിന്റെയും പ്രകടനം ഏറെ പ്രശംസിക്കപ്പെട്ടു.