ടര്‍ബോ ജോസിന് ശേഷം മമ്മൂട്ടിയുടേതായി ഒരുങ്ങുന്ന ഗംഭീര ആക്ഷന്‍ സിനിമയാണ് ‘ബസൂക്ക’. എന്നാല്‍ സിനിമയ്ക്കായി ഇനിയേറെ നാള്‍ കാത്തിരിക്കേണ്ടി വരുമെന്നും കുറച്ച് ഭാഗങ്ങള്‍ റീഷൂട്ട് ചെയ്യേണ്ടതുണ്ടെന്നുമുള്ള റിപ്പോര്‍ട്ടുകല്‍ കഴിഞ്ഞ ദിവസം പുറത്തുവന്നിരുന്നു. എന്നാല്‍ ഈ വാര്‍ത്തകള്‍ തെറ്റാണെന്നാണ് അറിയുന്നത്.
ചിത്രത്തിന് റിഷൂട്ട് വേണമെന്ന വാര്‍ത്ത തെറ്റാണെന്ന് അണിയക്കാര്‍ വ്യക്തമാക്കി. ചിത്രം ഈ വര്‍ഷം അവസാനമോ ജനുവരി 26നോ തിയറ്ററുകളിലെത്തുമെന്നാണ് അടുത്ത വൃത്തങ്ങളില്‍നിന്ന് അറിയാന്‍ കഴിഞ്ഞത്. സിനിമയുടെ പോസ്റ്റ് പ്രൊഡക്ഷന്‍ പുരോഗമിക്കുകയാണ്. വിഎഫ്എക്‌സ് രംഗങ്ങള്‍ അധികം വേണ്ടിവരുന്നതുകൊണ്ട് നല്ല സമയമെടുത്താണ് ടീം പ്രവര്‍ത്തനം.
മെഗാസ്റ്റാര്‍ മമ്മൂട്ടിയെ നായകനാക്കി നവാഗതനായ ഡീനോ ഡെന്നിസ് തിരക്കഥ രചിച്ച് സംവിധാനം ചെയ്യുന്ന ചിത്രമാണ് ബസൂക്ക. മമ്മൂട്ടിക്കൊപ്പം ഗൗതം മേനോനും ചിത്രത്തില്‍ പ്രധാന കഥാപാത്രമായി എത്തും. സരിഗമ ഇന്ത്യ ലിമിറ്റഡും തിയറ്റര്‍ ഓഫ് ഡ്രീംസിന്റെ ബാനറില്‍ ജിനു വി എബ്രഹാമും ഡോള്‍വിന്‍ കുര്യാക്കോസും ചേര്‍ന്നാണ് ചിത്രം നിര്‍മ്മിക്കുന്നത്.
സിദ്ധാര്‍ഥ് ഭരതന്‍, ബാബു ആന്റണി, ഹക്കീം ഷാജഹാന്‍, ഭാമ അരുണ്‍, ഡീന്‍ ഡെന്നിസ്, സുമിത് നേവല്‍, ദിവ്യാ പിള്ള, സ്ഫടികം ജോര്‍ജ് എന്നിവരും ബസൂക്കയില്‍ പ്രധാന വേഷങ്ങളിലെത്തും. നിമിഷ് രവി ആണ് ഛായാഗ്രാഹകന്‍. എഡിറ്റിങ് നിഷാദ് യൂസഫ്. സംഗീതം മിഥുന്‍ മുകുന്ദ്.