ഫെബ്രുവരി 9ന് ‘സ്ഫടികം’ സിനിമയുടെ 4കെ പതിപ്പ് തിയേറ്ററുകളില്‍ എത്തുകയാണ്. ഇതിനിടെ സ്ഫടികത്തിലെ പ്രധാന കഥാപാത്രങ്ങളായ ആടുതോമയെ കുറിച്ചും ചാക്കോ മാഷിനെ കുറിച്ചും ഒരു അധ്യാപിക സംസാരിക്കുന്നതിന്റെ വീഡിയോയാണ് സോഷ്യല്‍ മീഡിയയില്‍ ശ്രദ്ധ നേടുന്നത്.
ചിത്രത്തിന്റെ സംവിധായകനായ ഭദ്രന്‍ ആണ് ഈ വീഡിയോ തന്റെ ഫെയ്‌സ്ബുക് പേജിലൂടെ പങ്കുവച്ചത്. സ്ഫടികം സിനിമയിലെ ആടുതോമ എന്ന കഥാപാത്രത്തെ വര്‍ണ്ണിച്ചു കൊണ്ടാണ് ഈ ടീച്ചര്‍ സംസാരിക്കുന്നത്. യാദൃശ്ചികമായി തനിക്ക് ഈ വീഡിയോ ലഭിച്ചതെന്നും ഭദ്രന്‍ ഫെയ്‌സ്ബുക്ക് പോസ്റ്റില്‍ കുറിച്ചിട്ടുണ്ട്.
ഭദ്രന്റെ കുറിപ്പ്:
സ്ഫടികം ഒരു സിനിമയല്ല, അനേകം അധ്യായങ്ങളുള്ള ബൃഹത്തായ ഒരു ഗ്രന്ഥമാണ്. ആടുതോമ അതിലെ ആദ്യ അധ്യായമാണ്. വരികള്‍ക്കിടയിലൂടെ രക്ഷിതാക്കളും അധ്യാപകരും വായിച്ച് വ്യാഖ്യാനിക്കേണ്ടൊരു അധ്യായം. രണ്ടാമത്തെ അധ്യായം ചാക്കോ മാഷ്. ഇങ്ങനെ അനേകം അധ്യായങ്ങള്‍ ചേരുന്നൊരു ബൃഹത് ഗ്രന്ഥമാണ് സ്ഫടികം.
‘ഇനി ആടുതോമമാര്‍ സൃഷ്ടിക്കപ്പെടാതിരിക്കട്ടെ, ചാക്കോ മാഷുമാരുണ്ടാകാതിരിക്കട്ടെ’, പറയുന്നത് ഒരു ടീച്ചറാണ്. ഞാന്‍ കൂടി ഭാഗമായൊരു ചടങ്ങിലായിരുന്നു അവരിതു പറഞ്ഞത്. യാദൃശ്ചികമായി കഴിഞ്ഞ ദിവസം ആ വീഡിയോ എനിക്ക് മൊബൈലില്‍ ലഭിച്ചപ്പോള്‍ ഏറെ അര്‍ത്ഥവത്തായ ആ വരികള്‍ നിങ്ങളുമായി പങ്കുവയ്ക്കണമെന്ന് തോന്നി, ടീച്ചറെ പ്രണാമം.