ബേസിൽ ജോസഫ് പ്രധാന വേഷത്തിലെത്തുന്ന ചിത്രം ‘പാൽതു ജാൻവറിന്റെ മോഷൻ പോസ്റ്ററും റിലീസിങ് ഡേറ്റും പുറത്തുവിട്ടു. കുമ്പളങ്ങി നെറ്റ്സ്, ജോജി എന്നീ ചിത്രങ്ങളുടെ വിജയത്തിന് ശേഷം ഭാവന സ്റ്റുഡിയോസിന്റെ ബാനറിൽ ദിലീഷ് പോത്തൻ, ശ്യാം പുഷ്കരൻ, ഫഹദ് ഫാസിൽ എന്നിവർ ചേർന്നാണ് ചിത്രം നിർമ്മിക്കുന്നത്.
നവാഗത സംഗീത് പി രാജനാണ് ചിത്രത്തിന്റെ സംവിധാനം. ചിത്രം ഓണത്തിന് റിലീസിനെത്തുമെന്ന് നിർമാതവായ ഫഹദ് ഫാസിൽ വ്യക്തമാക്കി. ഫേസ്‌ബുക്ക് ലെെവിലൂടെയായിരുന്നു ദിലീഷ് പോത്തനും, ശ്യാം പുഷ്‌ക്കരനും ഫഹദ് ഫാസിലും സംവിധായകൻ സംഗീതും ചേർന്ന്‌ ചിത്രം പ്രഖ്യാപിച്ചത്.
“ഈ പഞ്ചായത്തിലെ എല്ലാ മൃഗങ്ങളും എന്റെ മനസിലുണ്ട്, അവരുടെ മനസിൽ ഞാനും” എന്ന ടാഗ് ലെെനോടെയാണ് ചിത്രത്തിന്റെ ടെെറ്റിൽ പോസ്റ്റർ പുറത്തു വിട്ടത്. സംഗീത് അമൽ നീരദ് അടക്കമുള്ള സംവിധായകരുടെ അസോസിയേറ്റ് ആയി പ്രവർത്തിച്ചിട്ടുള്ളയാളാണ്.
വിനോയ് തോമസ്, അനീഷ് അഞ്ജലി എന്നിവര്‍ ചേര്‍ന്നാണ് ചിത്രത്തിന്റെ രചന നിര്‍വ്വഹിച്ചിരിക്കുന്നത്. ബേസിലിന് പുറമെ ഇന്ദ്രൻസ്, ജോണി ആന്റണി, ദിലീഷ് പോത്തൻ, ഷമ്മി തിലകൻ, ശ്രുതി സുരേഷ്, ജയകുറുപ്പ്, ആതിര ഹരികുമാർ, തങ്കം മോഹൻ, സ്റ്റെഫി സണ്ണി, വിജയകുമാർ, കിരൺ പീതാംബരൻ, സിബി തോമസ്, ജോജി ജോൺ എന്നിവരും പ്രധാന കഥാപാത്രങ്ങളിൽ എത്തുന്നുണ്ട്. ജസ്റ്റിൻ വർഗീസ് ആണ് സംഗീതം. എഡിറ്റിംഗ് കിരൺ ദാസ്.