ദീപക് പറമ്പോലും പ്രയാഗ മാര്‍ട്ടിനും കേന്ദ്ര കഥാപാത്രങ്ങളാകുന്ന ഷൈജു അന്തിക്കാട് ചിത്രം “ഭൂമിയിലെ മനോഹര സ്വകാര്യ”ത്തിലെ പുതിയ ഗാനം സോഷ്യല്‍ മീഡിയയില്‍ ട്രെന്‍ഡിംഗ്. “”കണക്കിന്റെ പുസ്തകം”” എന്ന ഗാനമാണ് പുറത്തെത്തിയിരിക്കുന്നത്. സണ്ണി വെയിന്‍, അനശ്വര രാജന്‍, മാത്യു തോമസ് എന്നിവര്‍ ചേര്‍ന്നാണ് തങ്ങളുടെ ഔദ്യോഗിക പേജുകളിലൂടെ ഗാനം റിലീസ് ചെയ്തത്.
സച്ചിന്‍ ബാലു സംഗീത സംവിധാനം നിര്‍വഹിച്ചിരിക്കുന്ന ഗാനത്തിന്റെ രചയിതാവ് മനു മഞ്ജിതാണ്. ദേവദത്ത് ബിജിബാല്‍, കൃഷ്ണന്‍ ഉണ്ണി, സച്ചിന്‍ ബാലു എന്നിവര്‍ ചേര്‍ന്നാണ് ഗാനം ആലപിച്ചിരിക്കുന്നത്. വ്യത്യസ്തമായ മത വിശ്വാസങ്ങളുള്ള രണ്ടു പേരുടെ അസാധാരണമായ പ്രണയവും അതുണ്ടാക്കുന്ന സാമൂഹിക പ്രശ്‌നങ്ങളുമാണ് ചിത്രം പറയുന്നത്.
ബയോസ്‌കോപ് ടാകീസിന്റെ ബാനറില്‍ രാജീവ്കുമാര്‍ ആണ് ചിത്രം നിര്‍മ്മിക്കുന്നത്. എ ശാന്തകുമാര്‍ തിരക്കഥയും സംഭാഷണവും. ലാല്‍, ഷൈന്‍ ടോം ചാക്കോ, ഇന്ദ്രന്‍സ്, സുധീഷ്, അഭിഷേക് രവീന്ദ്രന്‍, അഞ്ചു അരവിന്ദ്, നിഷ സാരംഗ്, ഹരീഷ് പേരാടി, സന്തോഷ് കീഴാറ്റൂര്‍, മഞ്ജു എന്നിങ്ങനെ നിരവധി അഭിനേതാക്കള്‍ ചിത്രത്തില്‍ അണിനിരക്കുന്നുണ്ട്. ഫെബ്രുവരി 28ന് ചിത്രം തിയേറ്ററുകളിലെത്തും.