“ലേഡീസ് ആന്‍ഡ് ജെന്റില്‍മാന്‍” എന്ന ചിത്രത്തിന് ശേഷം മോഹന്‍ലാലും സിദ്ദിഖും വീണ്ടും ഒന്നിക്കുന്ന ചിത്രമാണ് ബിഗ് ബ്രദര്‍. ഷൂട്ടിംഗ് പൂര്‍ത്തിയായ ചിത്രം ജനുവരിയില്‍ തിയേറ്ററുകളിലെത്തും. റിലീസിന് മുമ്പേ മോഹന്‍ലാല്‍ ചിത്രം റെക്കോഡ് ബുക്കില്‍ ഇടം നേടുന്നു എന്നതാണ് പുതിയ വാര്‍ത്ത. മലയാള സിനിമയുടെ ചരിത്രത്തിലെ ഏറ്റവും വലിയ നോണ്‍- ജിസിസി ഓവര്‍സീസ് റൈറ്റ്‌സ് നേടുന്ന ചിത്രമെന്ന റെക്കോഡാണ് ചിത്രത്തെ തേടിയെത്തിയിരിക്കുന്നത്.
ബിഗ് ബ്രദറിന്റെ നോണ്‍- ജിസിസി വിതരണാവകാശം നേടിയെടുത്ത ട്രൈ കളര്‍ എന്റര്‍ടൈന്‍മെന്റ് തന്നെയാണ് ഈ വിവരം പുറത്തു വിട്ടിരിക്കുന്നത്. സൈബര്‍ സിസ്റ്റംസ്, വിംഗിള്‍സ്, ട്രൈ കളര്‍ എന്റെര്‍റ്റൈന്മെന്റ്‌സ് എന്നീ മൂന്നു വിതരണക്കാര്‍ ചേര്‍ന്നാണ് ചിത്രം നോണ്‍- ജിസിസി മാര്‍ക്കറ്റില്‍ റിലീസ് ചെയ്യുന്നത്. മോഹന്‍ലാലിന്‍റെ തന്നെ മരക്കാര്‍ അറബിക്കടലിന്‍റെ സിംഹത്തിന്‍റെ പേരിലാണ് നിലവില്‍ ജിസിസി റിലീസ് റെക്കോഡ് ഉള്ളത്.
https://twitter.com/TriColorENTMT/status/1201725940050432000
സച്ചിദാനന്ദന്‍ എന്ന കഥാപാത്രത്തെയാണ് മോഹന്‍ലാല്‍ ചിത്രത്തില്‍ അവതരിപ്പിക്കുന്നത്. സല്‍മാന്‍ ഖാന്റെ സഹോദരന്‍ അര്‍ബാസ് ഖാനും ചിത്രത്തില്‍ പ്രധാന വേഷത്തിലെത്തുന്നുണ്ട്. വേദാന്തം ഐപിഎസ് എന്ന കഥാപാത്രത്തെയാണ് അര്‍ബാസ് ചിത്രത്തില്‍ അവതരിപ്പിക്കുന്നത്. ആക്ഷന്‍ കോമഡി വിഭാഗത്തില്‍ ഒരുങ്ങുന്ന ചിത്രത്തില്‍ മൂന്ന് നായികമാരാണ് അണിനിരക്കുന്നത്. തെന്നിന്ത്യന്‍ നടി റജീന കസാന്‍ഡ്ര, സത്ന ടൈറ്റസ്, ജനാര്‍ദ്ദനന്‍, സിദ്ദിഖ്, വിഷ്ണു ഉണ്ണികൃഷ്ണന്‍, അനൂപ് മേനോന്‍, ചെമ്പന്‍ വിനോദ്, ടിനി ടോം, ജൂണ്‍ ഫെയിം സര്‍ജാനോ ഖാലിദ് തുടങ്ങിയവരും ചിത്രത്തില്‍ പ്രധാന വേഷങ്ങളിലെത്തുന്നു.