72കാരനായി വമ്പന്‍ മേക്കോവറില്‍ നടന്‍ ബിജു മേനോന്‍. “ആര്‍ക്കറിയാം” ചിത്രത്തിലെ ബിജു മേനോന്റെ ലുക്കാണ് സോഷ്യല്‍ മീഡിയയില്‍ ചര്‍ച്ചയാകുന്നത്. മുഖത്ത് ചുളിവുകള്‍ വീണ, മുടിയും മീശയും നരച്ച ഒരു എഴുപത്തിരണ്ടുകാരനായ ഇട്ടിയവറ എന്ന കഥാപാത്രമായാണ് ബിജു മേനോന്‍ ചിത്രത്തിലെത്തുന്നത്.
ചിത്രത്തില്‍ പാര്‍വതി അവതരിപ്പിക്കുന്ന കഥാപാത്രത്തിന്റെ അച്ഛന്‍ റോളിലാണ് ബിജു മേനോന്‍ എത്തുന്നത്. ഷറഫുദ്ദീന്‍ ആണ് ചിത്രത്തിലെ മറ്റൊരു പ്രധാന കഥാപാത്രം. ഛായാഗ്രാഹകനായ സാനു ജോണ്‍ വര്‍ഗീസ് ആദ്യമായി സംവിധാനം ചെയ്യുന്ന ചിത്രമാണ് ആര്‍ക്കറിയാം. സൈജു കുറുപ്പ്, ആര്യ സലീം എന്നിവരും ചിത്രത്തില്‍ അഭിനയിക്കുന്നുണ്ട്.
മൂണ്‍ഷോട്ട് എന്റര്‍ടെയിന്‍മെന്റും ഒപിഎം ഡ്രീംമില്‍ സിനിമാസിന്റെയും ബാനറില്‍ സന്തോഷ് ടി കുരുവിളയും ആഷിഖ് അബുവും ചേര്‍ന്നാണ് ചിത്രം നിര്‍മ്മിക്കുന്നത്. ചിത്രത്തിന്റെ തിരക്കഥ നിര്‍വഹിച്ചിരിക്കുന്നത് ജോണ്‍ വര്‍ഗീസും രാജേഷ് രവിയും അരുണ്‍ ജനാര്‍ദ്ദനനും ആണ്. ഫെബ്രുവരി 26-ന് ചിത്രം തിയേറ്ററില്‍ റിലീസ് ചെയ്യും.
ജി ശ്രീനിവാസ റെഡ്ഡിയാണ് ചിത്രത്തിന്റെ ഛായാഗ്രഹണം. മഹേഷ് നാരായണന്‍ എഡിറ്റിംഗും യാക്‌സണ്‍ പെരേര, നേഹാ നായര്‍ എന്നിവര്‍ സംഗീതവും ഒരുക്കുന്നു. സംവിധായകന്‍ രതീഷ് ബാലകൃഷ്ണന്‍ പൊതുവാളാണ് ചിത്രത്തിന്റെ പ്രൊഡക്ഷന്‍ ഡിസൈനര്‍. ജ്യോതിഷ് ശങ്കര്‍ കലാസംവിധാനം, രഞ്ജിത് അമ്പാടി മേക്കപ്പ്.