നടി ആകാന്‍ഷ ദുബെയുടെ ദുരൂഹ മരണത്തില്‍ രണ്ട് പേര്‍ക്കെതിരെ കേസ്. ഭോജ്പുരി ഗായകന് സമര്‍സിംഗ്, സഹോദരന്‍ സഞ്ജയ് സിംഗ് എന്നിവര്‍ക്കെതിരെയാണ് കേസ് എടുത്തിരിക്കുന്നത്. കഴിഞ്ഞ ശനിയാഴ്ചയാണ് സാരാനാഥിലെ ഒരു ഹോട്ടല്‍ മുറില്‍ ഭോജ്പുരി നടിയെ തൂങ്ങിമരിച്ച നിലയില്‍ കണ്ടെത്തിയത്.
നടിയുടെ അമ്മ മധു ദുബയുടെ പരാതിയുടെ അടിസ്ഥാനത്തിലാണ് ഗായകനും സോഹദരനുമെതിരെ കേസെടുത്തതെന്ന് സാരാനാഥ് പൊലീസ് വ്യക്തമാക്കിയതായി എന്‍ഡിടിവി റിപ്പോര്‍ട്ട് ചെയ്തു. ആത്മഹത്യാ പ്രേരണയ്ക്കും മറ്റ് പ്രസക്തമായ വകുപ്പുകള്‍ക്കും എഫ്‌ഐആര്‍ രജിസ്റ്റര്‍ ചെയ്തിട്ടുണ്ട്.
ഇരുവര്‍ക്കുമെതിരെ നടിയുടെ കുടുംബം നേരത്തെയും ഗുരുതര ആരോപണങ്ങള്‍ ഉന്നയിച്ചിരുന്നു. ഇരുവരും നടിയെ ഭീഷണിപ്പെടുത്തിയെന്നാണ് ആരോപണം. കഴിഞ്ഞ മൂന്നു വര്‍ഷമായി കോടിക്കണക്കിന് രൂപയുടെ ജോലി ചെയ്തിട്ടും ഇരുവരും പണം നല്‍കിയിരുന്നില്ലെന്നും സഞ്ജയ് സിംഗ് മകളെ കൊല്ലുമെന്ന് ഭീഷണിപ്പെടുത്തിയിരുന്നതായും നടിയുടെ അമ്മ വെളിപ്പെടുത്തി.
എന്നാല്‍ നടിയുടെ മുറിയില്‍ നിന്ന് ആത്മഹത്യ കുറിപ്പൊന്നും കണ്ടെടുത്തിട്ടില്ല. ഒരു സിനിമയുടെ ചിത്രീകരണത്തിനായി വാരണാസിയില്‍ എത്തിയതായിരുന്നു ആകാന്‍ഷ. മരിക്കുന്നതിന് മുമ്പ് ഇവര്‍ കണ്ണീരണിഞ്ഞ് ഇന്‍സ്റ്റഗ്രാം ലൈവില്‍ പ്രത്യക്ഷപ്പെട്ടിരുന്നു.
മരണത്തിന് തൊട്ടുമുമ്പ് ഒരു ഗാനത്തിന് നൃത്തം ചെയ്യുന്നതിന്റെ വീഡിയോ ഇവര്‍ പങ്കുവച്ചിട്ടുണ്ട്. രാവിലെ ഒമ്പതിന് മേക്കപ്പ് ബോയ് വിളിച്ചപ്പോഴാണ് നടിയെ മരിച്ച നിലയില്‍ കാണപ്പെട്ടത്. മിര്‍സാപൂര്‍ സ്വദേശിയാണ്. 25 വയസ്സുള്ള ഇവര്‍ ‘മേരി ജങ്ക് മേരാ ഫൈസല’ എന്ന ചിത്രത്തിലൂടെയാണ് അഭിനയരംഗത്തെത്തിയത്.