നടന്‍ റാണ ദഗുബതിക്കും കുടുംബത്തിനുമെതിരെ കേസ്. ഹൈദരാബാദിലെ ഡെക്കാന്‍ കിച്ചന്‍ റസ്റ്റോറന്റ് ഉടമ കെ.നന്ദകുമാറിന്റെ ഹര്‍ജിയിലാണ് കേസ് എടുത്തിരിക്കുന്നത്. റാണ, വെങ്കടേശ്, പിതാവ് സുരേഷ് ബാബു, സഹോദരന്‍ അഭിറാം ദഗുബതി എന്നിവര്‍ക്കെതിരെയാണ് കേസ്.
ഹൈദരാബാദ് ജൂബിലി ഹില്‍സില്‍ ദഗുബതി കുടുംബത്തിന്റെ വസ്തുവില്‍ സ്ഥിതി ചെയ്യുന്ന ഡെക്കാന്‍ കിച്ചന്‍ ഹോട്ടല്‍ തകര്‍ത്ത സംഭവത്തിലാണ് താരകുടുംബത്തിനെതിരെ കേസ് വന്നിരിക്കുന്നത്. നിയമവിരുദ്ധമായി ഹോട്ടല്‍ പൊളിച്ചെന്ന് ആരോപിച്ചാണ് ഡെക്കാന്‍ കിച്ചന്‍ ഉടമ കെ നന്ദകുമാര്‍ കേടതിയെ സമീപിച്ചത്.
ഹോട്ടല്‍ തകര്‍ത്തതോടെ 20 കോടിയുടെ നഷ്ടമുണ്ടായി എന്നാണ് ഹര്‍ജിയില്‍ പറയുന്നത്. ഹോട്ടല്‍ വാടകക്ക് നല്‍കുന്നത് സംബന്ധിച്ച് കോടതി ഉത്തരവുണ്ടായിട്ടും വിലപിടിപ്പുള്ള കെട്ടിടം അനധികൃതമായി പൊളിച്ച് നശിപ്പിച്ച് ഫര്‍ണിച്ചറുകള്‍ കൊണ്ടുപോയെന്നും നന്ദകുമാര്‍ ആരോപിക്കുന്നുണ്ട്.
അതേസമയം, വിരാടപര്‍വം ആണ് ഏറ്റവും ഒടുവില്‍ പുറത്തിറങ്ങിയ റാണയുടെ ചിത്രം. ‘ബാഹുബലി 2’വിന് ശേഷം എത്തിയ റാണയുടെ മിക്ക ചിത്രങ്ങളും പരാജയങ്ങളായിരുന്നു. ‘വേട്ടയ്യന്‍’ ആണ് റാണയുടെതായി ഇനി റിലീസിന് ഒരുങ്ങുന്ന ചിത്രം. ഈ രജനി ചിത്രത്തില്‍ ഒരു പ്രധാനപ്പെട്ട റോളിലാകും റാണ എത്തുക.
